Tura, Nailar 11: U Deputy Commissioner jong ka West Garo Hills District u Pravin Bakshi, u la ong ba mynta ki dang iaid sha khmat ban shim jingkhien ha kaba ia dei bad ka jingduh na ka daw jong ka jingshlei um hapoh jong ka District kaba la jia ha kine ki sngi kiba la dep.
La ong ba haduh mynta ka sngi ki kaiphot ki dang wan bad ia ka jingkhein katno ka jingduh na kane ka jingshlei um yn sa lah ban ai sha ka sorkarha kine ki sngi ki ban dang wan. Ki ophisar mynta ki dang ialeh ban shim jingkhein ban lap ia ka jingduh.
La ong ba kaba la shah ktah eh ha kane ka jingshlei um ki long ki lai tylli ki kam kaba ki briew ki trei ha kitei ki thain ba long madan, kata ka rep khamtam eh u kba, ki jingri bad ki pung dohkha. Haba ia dei bad ki surok la ong ba ka jingshim jingkhein ka dang iaid sha khmat.
Na ka liang jong u Deputy Commissioner u la iathuh ba kumba ka long mynta ka um kala hiar bad ki briew kiba don ha ki jaka sah ba la buh da ka sorkar kila sdang ban leit phai sha la ki jong ki jong ki shnong. Na ka liang jong ka ophis ka dang peit ia ka rukom ai jingiarap sha ki briew kiba la shah ktah ha kane ka jingshlei um.
