New Delhi, Rymphang 27: U Rajesh Bhushan, u Health Secretary ka Sorkar Pdeng mynta ka sngi u la iakren bad ki Health Secretary bad ki MD (NHM) jong ki jylla bad ki UT lyngba ka video conference halor ka jingai dawai Covid ia kito kiba dei ioh ia kane ka dawai.
Ia ka jingai dawai COVID-19 kaba la pynlong ha kylleng ka ri mynta ka la sdang ha ka 16 tarik u Kyllalyngkot, 2021. Naduh kane ka sngi, ki nongai jingsumar (HCW) ki la ioh ia ka bynta kaba nyngkong jong kane ka jingai dawai katba kito kiba trei ha ki kam kiba iadei bad ka COVID ki la sdang ioh dawai ha ka 2 tarik u Rymphang, 2021. Haduh mynta, la dep ai dawai palat 1.5 klur.
Ia kane ka jingai dawai ha ka ri la pyniar na ka bynta kine kiba dei ban ioh dawai harum naduh ka 1 tarik u Lber, 2021:
i) Baroh ki briew ka ri kiba la palat 60 snem ka rta, bad
ii) Kito kiba hapdeng 45 bad 59 snem kiba la don lypa ia ki jingpang
Ban pynkhlain shuh shuh ia ki lad ai dawai, la pyndonkam lang ia ki jaka trei jong ki briew bad ki kynhun shimet. Kumba 10,000 tylli ki hospital shimet kiba don hapoh ka Ayushman Bharat PMJAY, palat 600 tylli ki hospital kiba don hapoh ka CGHS bad kiwei kiwei ki hospital shimet kiba don hapoh ki skhim Health Insurance jong ki Sorkar Jylla ki lah ban iashim bynta kum ki COVID Vaccination Center (CVC).
Ki tnat ka koit ka khiah jong ki Sorkar Jylla ki la dep sdang ia ki jingiakren bad kine ki hospital shimet khnang ban pynshlur ia ki ba kin iashim bynta ha kane ka kam ai dawai kum ki CVC. La buh ia ka thup kyrteng jong baroh kine ki hospital ha ka website jong ka tnat ka Koit ka Khiah jong ka Sorkar Pdeng bad ka National Health Authority.
Shuh shuh, kin don ki jaka ai jingsumar jong ka Sorkar ki ban pyndonkam kum ki CVC kum ki meical college hospital, ki distrik hospital, ki sub-division hospital, ki CHC, PHC ki Health Sub Centre bad ki Health & Wellness Centre. La pynkhreh ia ki Geo reference map bad ki GPS jong baroh kine ki jaka ai jingsumar ki ban treikam kum ki CVC bad la sam ia kine ki geo reference map bad ki Sorkar Jylla.
Kine ki CVC jong ka Sorkar kin ai ei ia u dawai COVID ha kaba ka Sorkar kan bah ia ka jinglut jingsep na ka bynta ka jingai dawai.
Baroh ki jaka ai jingsumar jong ki briew bad ki kynhun shimet ki ban long kum ki CVC jong ka Sorkar ki dei ban bud pyrkhing ia ki kyndon bad ki rukom trei, ka jingbiang ha ka rukom trei bad ka jingiada kaba kynthup ruh bad ka jingiasoh bad ka National Co-Win technology platform.
Baroh ki jaka ai jingsumar jong ki briew bad ki kynhun shimet ki dei ban don ka jaka kaba biang, ki jaka pyh pynpjah, ki nongai dawai bad kiba iarap ia ki bad ki lad ban ialeh pyrshah kano kano ka jingshitom kaba mih na ka jingai dawai.
La batai ia ki jylla shaphang ki 3 tylli ki rukom pynrung kyrteng kum ka Advance Self Registration, Onsite Registration bad ka Facilitated Cohort Registration.
La batai ruh ia ki jylla ba ki hospital jong ki briew bad ki kynhun shimet kiba trei kum ki CVC ki lah ban shim haduh T. 250 na man u briew, man ka dose bad kiwei kiwei ki jingdonkam ha kane ka kam. Ha kane ka jingialang, la iakren ruh shaphang ka jingai ia ki user name bad ki password ia kine ki jaka ai jingsumar khnang ba kin lah ban pyntrei bha ia ka CoWIN 2.0.
Shuh shuh, la batai ia ki jylla shaphang ka jingsaindur ia ki map jong baroh ki jaka ai jingsumar jong ki briew bad ki kynhun shimet kiba jan tam ia ki jaka buh pyndait thah khnang ban iaid ryntih ka jingpynpoi ia ki dawai.
La batai ruh ia ki jylla shaphang ka rukom pynshisha ia ki briew kiba don kano kano napdeng 20 jait ki jingpang kiba hapdeng ka rta 45 bad 59 snem. Kane ka certificate kaba dei ban soi da uno uno u doktor la suh lang hangne. Ia kane ka certificate lah ban upload ha ka Co-WIN2.0 da uto uba dei ban ioh dawai katba u dang pynrung kyrteng ialade lane lah ban ai da ka kot ha ka CVC.
