Shillong, Nailur 19: Ka seng jong ki nongthoh kot Khasi, ka Khasi Authors’ Society (KAS) dangshen ka la rakhe ïa ka sngi ka thoh katar kaba dei ka lyngkhuh dap snem ba 42 jong ka seng. Ha kane ka jingrakhe namar ka jingdon ka khlam Covid-19 la pynlong ruh ïa ka Webinar halor ka phang “Ka jinglong kyrpang u Khasi kum ka jaitbynriew”.
Ha kane ka Webinar la pynïaid ïa ka jingïalang da ka kong Prof. Streamlet Dkhar, Executive Member KAS bad la kren pdiang sngewbha ïa ki nongïashim bynta da u Dr. R. P. Kharshiing, General Secretary, KAS. Ha kane ka jingrakhe la ïoh ka jingkren maitphang na u Prof. DRL Nonglait, President KAS bad u Kongsan ha kane ka jingrakhe u long u Ma Vincent Pala, MP Lok Sabha.
Ki riewshemphang ha kane ka webinar ki long u Dr. Fabian Lyngdoh, Nonghikai barim jong ka MLCU, Shillong ha kaba u la kren halor ka phang “Ka Jinglong kawei ka jaitbynriew Khasi” bad u Prof. Desmond L. Kharmawphlang, Nonghikai jong ka skulbah NEHU, Shillong u la kren halor ka phang “Ka jinglong kyrpang u Khasi kum ka jaitbynriew: Ka Folklore kum ka ïitkhmih”.
Ha ka Jingkren Lamphrang u Prof. Nonglait u la batai ïa ka jingïaid lynti ka seng naduh ka snem 1979 haduh mynta. Ha ka jingkren u la maitphang ruh halor ka phang jong ka webinar ha kaba u la batai ba ka Jinglong kyrpang ka thew ïa ka kynhun imlang sahlang ha kaba ki dkhot jong ka ki don ïa ka jinglong tynrai, ki hok bad ïa ka kyrdan ba ïadei lang.
U la bynrap shuh shuh ba ki snap jinglong kyrpang jong ka jaitbynriew Khasi ki long; 1) Ngi don kajuh ka thymmei hiar pateng kaba mut na kata ka thymmei Hynñiewtrep Hynñiewskum bad ka kyntien ‘Khasi’ ka long ka kyntien kaba ïadei lang ïa ki khun u Hynñiewtrep. Ngi don kajuh ka khana pateng shaphang ka khana hiar pateng u Hynñiewtrep.
Ngi don ïa kajuh ka kolshor kaba dei lang ïa baroh. Ngi don ïa ka juh ka jait ka kynja kaba wan na ka kmie. 5) Ngi don ïa kajuh ka ktien kaba ngi lah ban sngewthuh, watla ngi don shibun ki ktien tnat. 6) Ngi don kajuh ka thymmei ri kaba mut ïa ka synshar ka khadar bad kiwei kiwei.
Ha ka jingkren kum u Kongsan, u Ma Vincent Pala u la ai ka jingkyrkhu kyrdoh ïa ka seng halor ka jingrakhe ïa ka Literary Day, kaba dei ruh ka lyngkhuh dap snem ba 42 snem jong ka KAS.
U kongsan u pynpaw ba u long ruh uba kloi ban ïatrei lang na ka bynta ban pynurlong ïa ka jingdawa ban pynrung ïa ka ktien Khasi ha ka Khyrnit baphra jong ka riti synshar ka Ri bad u kyntu ruh ïa baroh ban kyrshan lang ïa ki mat jingdawa jong ka KAS.
Ha kaba ïadei bad ka phang jong ka webinar; u kongsan u pynpaw ba kum u nongmihkhmat paidbah u la leit kylleng kylleng ki jaka ha ri India bad shabar na ka ri India. U shem ba ka jaitbynriew Khasi ka long kaba kyrpang shisha; naduh ka suiñbneng kaba pyngngad, ka kolshor kaba ryntih, ka rukom im, ka ktien ka thylliej bad kiwei kiwei ki bynta kiba pynpaw shisha ïa ka jinglong kyrpang ka Jaitbynriew.
Hooid ha kine ki khyndiat snem, ki don katto katne ki jingkylla na ka daw ka jingwan tyllep kiwei ki jaitbynriew, hynrei u kyntu ba kum ka jaitbynriew ngim dei pat ban duh mynsiem hynrei ngi dei ban pynshlur ïa ki samla bad ki khun ki kti ban pynneh pynsah ïa la ka kolshor da kaba wadbniah bad thoh ruh ïa ka history jong ka jinglong kyrpang ka jaitbynriew Khasi.
Ha ka jingkren, u Dr. Fabian Lyngdoh kum u riewshemphang u la batai ïa ka jingsdang ka jaitbynriew Khasi kaba la don ha kine ki lum palat hajar snem mynta. Ka jinglong kawei ka jaitbynriew ka dei na ka longkur longjait, kumta kane ka jaitbynriew ka long kaba kham pher na kiwei pat ki jaitbynriew kiba ker tawiar ïa ngi.
Naduh basdang ngi long tang kawei ka ri bad suki suki ki kur ki krih kylleng ki jaka ha ka ri; bad ka jingmut haba ong Ri Bhoi lane Jaiñtia (Hima) ki dei ki kyrteng kiba mih dang shen eh dang ha ki spah snem ba khatlai lane khatar spah snem (Haba pynshisha na ki jingthoh la shem ba ki jaitbynriew Khasi kiba sah ha ki thaiñ sepngi la khot da ki Synteng lane Pnar).
Namarkata, baroh ki jaka kiba don kylleng ka Ri Khasi ngi dei ka juh ka jaitbynriew halor ka nongrim jong ka jingïadei kur kaba mut ka longkur longjait. U riewshemphang u la batai shuh shuh ba ka Jaitbynriew Khasi kam don sub-tribe kum kiwei ki jaitbynriew riewlum, hynrei ngi dei tang kawei ka jaitbynriew.
U Prof. Desmond L. Kharmawphlang haba ai jingkren kum u riewshemphang u la batai ïa ka jingmut ki khanatang bad u la ong ruh ba baroh ki kolshor ki mih bad la tei na ki khanatang. Haba phai sha ka jaitbynriew Khasi la shem ba ka long ka jaitbynriew kaba riewspah bha ha ka liang ki khana bad jingïathuh khana pateng, kum ka jingïathuh khana shaphang u Lum Sohpetbneng.
U riewshemphang ula batai ba ha ka jingtih bniah ha ka snem 2014 na ki dak ki shin la shem ba kane ka jaitbyntiew khasi ka la buhai shnong hangne naduh 1226 shuwa u khrist. Hadien ka jingkren na ki riewshemphang, la pynbud da ka jingïaphylliew jingmut hapdeng ki nongïashim bynta baroh.
Ha kaba ka sur kaba mih na kane ka webinar, ka long ba ka KAS ka dei ban pynlong shuh shuh kum kine ki webinar bad ban pynmih ruh ïa ki jingkren ha ki jingthoh khnang ba ki dkhot ka jaitbynriew kin khamshai halor kane ka phang.
Ha kane ka jingïalang, ki nongïashim bynta ki kynthup ïa ki dkhot ka KAS, ki nongthoh kot, ki nonghikai na ki skul, ki kolej & University, ki samla pule bad ki riewrangbah.
