Umtangling, Lber 10: Mynta ka sngi ka seng Hynniewtrep People Front (HPF) kala leit ban jurip ia ka Irrigation Dam kaba don ha wah Umian ha Ri Bhoi District hapoh jong ka Umroi Konstitwensi hapoh ka shnong Umtangli kaba la paid ha dien ba la dep ban shna da ka tnad Irrigation jong ka sorkar jylla.
U Bah Justin Kharbuki general secretary ka HPF Ri Bhoi District haba kren ha ki lad pathai khubor ha katei ka jaka u la dawa ba ka tnad Irrigation ka dei ban pynshitom ia ki ophis kiba don kti ban shna torti ia kane ka Irrigation Dam hapoh ka shnong Umtangling kaba la paid ha dien ba la dep ban shna ia kane ka dam.
U tei u nongialam jong ka seng HPF u la ong, kaei kaba la pynlong ia ka seng ban leit ban jurip ia katei ka dam katno ka pang ka mynsiem ban iohi ba kane ka dam kala paid, ka sorkar katno ka pisa kala pynlut ha katei ka Irrigation dam, haba peit ki nongrep kim shym la ioh kano kano ka jingmyntoi ei ei na kane ka dam.
Ha ka jingshisha na kane ka Irrigation dam ki nongrep kila dei ban ioh ia ka jingmyntoi, sha rum jong kane ka dam ki don shibun bah ki pythor kba, hynrei haba peit pat ia kane ka dam ka long kaba pynsep ei ia ka pisa jong u paidbah, ka seng ka buh ka jingkylli balei la pynsep ei ia ka pisa jong ki paidbah bad jong ka sorkar.
Ka seng ka dawa ba kino kino ki ophisar kiba don kti ha kaba shna ia kane ka irrigation Dam ka sorkar lyngba ka ain kala dei ban kem ia kine bad dei ban pynshitom namar ba khlem shna bha ia kane ka kam, ka seng ka kylli ruh haduh katno ngut ki master roll kiba la thung ban peit ia kane ka jaka.
Ka seng HPF ka pang mynsiem ban iohi haba ka um kala don lypa kaba wan tuid na Umiam balei kim pyntrei kam bha, kane ka long ka jingduh nong kaba khraw ia ka jylla bad khatam ia ka Ri Bhoi bad ki nongrep ha kane ka jaka.
Ha ka juh ka por la kyntu ia ka sorkar ba ka dei ban shim khia noh ban pyndepnoh ia kane ka dam um na ka bynta ka jingmyntoi jong ki paidbah, namar kumba ka long mynta kane ka dam kala paid. Na ka liang jong ka seng kan bud dien ia kane ka Dam haduh ban da dep na ka bynta ka jingmyntoi jong ki paidbah.
U Bah Kronding Nongbsap nongai khubor jong ka seng kmie jong ka HPF u la ong ba ka jingbethei jong kane ka dam kala ktah shisha ia ki nongrep, la ong ba ha kine ki ar snem kiba la dep la wan ki kontraktor kiba la wan sha katei ka jaka kila wan rah ia ki JCB hynrei ki jah noh.
Kane ka Irrigation Dam kaba don ha Umtangling ka dei kaba heh duh hapoh Ri Bhoi, ka sorkar ka dei ban tohkit halor kane bad ban pynshitom ia kiba don kti katkum ka jingleh ka jong ki ha kaba shna ia kane ka dam. Ka seng HPF kan bud dien ia kane ka kam bad kin iaid katkum ki lynti jong ka ain.
Da ka jingbthei kane ka dom um ka long pynduh nongia ki nongrep kiba bun ki shnong kiba don ha kane ka thain, kum ka shnong Umtangling, Umsyntung, Mensain, Pynthor, Umshaw bad kiwei kiwei, kane ka irrigation dam kala pynduh nong kumba 500 tylli ki long iing katei ka thain.
Ia kane ka dam la shna ha ki snem 2000 bad ka jingbethai kane ka dam ka long ha kito ki snem 2005 lane 2006. Ha kane ka jingleit jurip la don lang ruh ki dkhot jong ka seng bad u rangbah shnong jong kane ka shnong Umtangling bad u President ka Ri Bhoi u Bah Apbor Nongrum.
