Shillong, Jymmang 30: Ka HYC Seng Kmie ka pynpaw ia ka jingpyrshah kaba jur halor ka rai jong ka Sorkar Jylla ban shah
ia ki Kontraktor, ki Kompeni bad ki nongai bylla ha ki kam bapher bapher ba kin wan ialam ia ki Nongtrei na bar Jylla. Kane ka rai jong ka Sorkar kan buh jingma shibun kum ka Jylla bad ki sngew kyndit ba ka Sorkar ka khlem da pyrkhat bha halor ka jingma kaba lah ban wanrah lyngba kane ka rai ka jong ka bad ka ban buh pynbna ia ki Nongshongshnong ha ka jingeh.
Ka Seng ka sngew ban pynkynmaw ia ka Sorkar ba haduh mynta ki iohi ba ka jingsiew stet jong kane ka jingpang ha kiba bun ki jaka hapoh Ri India kam pat sangeh bad khamtam na ki Jylla kum ka Assam, West Bengal bad kiwei, kiba dei ki Jylla kiba bun ki Nongwan bylla ha kane ka Jylla Jong ngi ki wan ban trei ban ktah.
Katkum ka jingtip la ong ruh ba lada khein jingkhein kitei ki Jylla ba lah kdew haneng ki long ki Jylla kiba ki Nongpang Covid 19 ki don haduh 80 na ka 100 ha ka Ri baroh kawei. Kaba mut ba ha kine ki Jylla ki dang bun ki briew kiba iohpang bad ki ban dang ioh ruh. Kumta mano ban tip ba lada yn shah ia ki Nongbylla na kine ki Jylla ba kin wan ban rung, ioh ki kylla long pynbna ki nong wanrah ia une u Khniang jingpang kaba lah ban buh jingma ia ki Trai Jylla pat baroh.
kawei ka jingma kaba buh ia ki paidbah ka Jylla na kane ka rai jong ka Sorkar ka long ba kumba ka paw mynta kiba bun kiba ioh pang kim don ia ki dak ki shin Jong kane ka Jingpang asymptomatic hynrei tad haduh ba lah leh ia ki test ia ki lah lap ba ki don jingpang.
Ka Sorkar ia mynta kumba ka paw ia ki Nongshongshnong ka Jylla kiba wanphai ki hap ban leh ia ki test bad ki buh ia ki ha ki jaka ba kyrpang khnang ba kin nym long ki nongpynsaphriang ia kane ka jingpang. Ka seng ka kwah ban sngewthuh, hato ka Sorkar kan leh kumjuh ia kine ki Nongbylla kiba wan na bar Jylla.
Don jaka ban buh ia ki ha ki Quarantine Centre shwa ban shah ia ki ba kin trei ia ki kam bapher bapher, Mano ban shim jingkitkhlieh ia ka ban sumar bad pynbiang ia ki jingdonkam jong kine ki bar Jylla hapor ba buh ia ki ha ki jaka ba kyrpang.
Kumba ka paw lyngba ki lad pathai khubor la iohi ba ka Sorkar ka shu phah ia ki Nongaikam ba kin pan jingbit na ka ophis Jong ki DC khlem don kino kino ki jingpynshai la kine ki briew kin hap iaid lyngba ia kijuh ki Lyndon kumba leh ia kiba wanphai sha ka Jylla lajong ha kine ki sngi.
Sorkar ka hap ban pynshai shuwa ia kitei ki jingsngew Jong ka Seng bad kumjuh Jong ki Paidbah ka Jylla ha shuwa ban shah ia ki bar Jylla ban wan bylla sngi ha kane ka Jylla.
Na ka Liang ka Seng ka dawa ba ka Sorkar kadei ban pyndam shuwa ia Katei ka rai tad haduh ba kane ka jingpang kan jem bad ruh tad haduh ba ka Jylla ka Jong ngi ka khuid na kane ka Jingpang. Ia mynta ngim sngew iahap ban buh jingma ia uba bun Balang tang namar ka jingdonkam Jong ki katto katne ki nongaikam.
Ka Seng ka kyntu ia ki Dkhot baroh kiba don ha kylleng ki shnong ki thaw Jong ka Ri lum Khasi Jaintia ba kin phikir bha ha la ki jong ki jaka treikam bad ki shnong ki thaw ban pyntikna ba ym dei ban don kino kino ki briew kiba thymmai khamtam ki bar Jylla ba kin rung sha kane ka Ri ka Jong ngi bad kumjuh ruh ban iatreilang bad ki Bor Shnong ban pynher krad lyngba ka SLO jong ka Seng ia kiba kum kine ki briew.
Kumba ong ka ktien ” Kam banse ka thom ia ka sang” , ka Seng ruh kan thom ia ka sang ka ma ban beh krad hi ia kiba kum kine ki nongbylla lada ki wanrung hapoh ki shong ki thaw ki Jong ngi khlem da sngap ia ka rai jong ka Sorkar.
Ka Seng ka maham ruh ia ki Kontraktor, ki Kompeni bad ia baroh ki nongaibylla ba kim pat dei ban wan ialam Nongtrei na shabar Jylla ia mynta hi bad lada lap ki dkhot ka Seng kin sa pyntreikam ia ka SLO ha kiba kum kine ki jaka trei.
ka HYC ka kyrpad ia ka jingiatreilang la Jong phi baroh ha kum kane ka por na ka bynta ka bha ka miat Jong ngi lang baroh. La ong u bah Roy Jupar Synrem ha ka kyrwoh bala phah mynta ka sngi.
