Shillong, Jymmang 07: Ka Hynniewtrep Youth Council Sohiong Circle mynta ka sngi ka 7 tarik u Jymmang 2024 ka la leit ban ia kynduh bad kumjuh ruh ban ai da ka jingthoh sha u Sub Divisional District School Education Officer jong ka East Khasi Hills District u bah JA Marwein ban dawa na u ba u dei ban thungkam pat ia ka kong Teldaris Nongbri.
Kane ka nonghikai ka ba la ai ka jingshakri ha poh ka Laitnongkseh LP Skul bad kumjuh ruh ban pynshitom ia u bah P Shylla u ba dei u Head Teachers cum Secretary jong kane ka skul bad kumjuh ruh ban pan jingpynshai ha lor ka jingshah wengkam jongkane ka kong T Nongbri.
Ha ba ioh ban iakren bad u General Secretary jong ka seng HYC sohiong Circle u bah Hamarbamut Thabah u la ong ba na ka liang ka seng ka la dawa ia ka ophis jong u SDSEO ban ai ia ki daw ki ba biang halor ka jingweng kam noh ia ka kong T Nongbri .
Ka HYC ka kwah ban tip mano ki ba don kti halor kane ka jingwengkam bad myno la weng kam bad hato ka ophis office ka don bynta lang ne em halor kane ka bynta ban weng kam ia kane ka nonghikai .
U bah Thabah u la ongruh ba na ka liang ka seng ka dawa ia ka ophis jong ka SDESEO ba ki dei ban ai ka jubab hapoh ka 14 sngi hynrei lemkumta na ka liang ka seng HYC kam banse ban shim da kiwei pat ki sienjam. Ka seng ka dawa ruh ba kidei ban thungkam biang ia ka kong Teldaris Nongbri.
Ka seng HYC ka la buh ruh ka jingkylli ba hato ka ophis ka pynlait ne em ka pisa sha ka kong T Nongbri naduh u snem 2016 haduh u snem 2020 ne 2021, 2022 bad 2023.
Ka seng HYC ka la pan ruh ka jingpynshai ba balei ym shym la lah ban pynlait ia ka tulop haba ka ophis ka la dep ban pdiang ia ka kong T Nongbri kum ka nonghikai jong ka skul.
