Shillong, Jylliew 14” Ka National Domestic Workers Movement (NDWA) Meghalaya, mynta ka sngi ka la dawa na ka sorkar jylla ban kynthup ia baroh ki nongbylla treikam ing Katkum ka minimum wages board ba kan iarap ia ki ba kin lah ban pyndap ia ki jingdonkam jongki.
Haba kren bad ki nongthoh khubor ka kong Ebina Nongkhlaw ka la iathuh ba ha ka 16 tarik jylliew ka NDWA Meghalaya region kan sa pynlong ia ka jingrakhe ia ka International Domestic Workers weeks bad ruh ban ai jinghikai ia ki nongbylla treikam ing briew ba kin tip shaphang ki hok jongki ha ki jaka bylla jong ki.
Ka kong Ebina Nongkhlaw ka pyntip ruh ba ki don palat 3000 ngut tam ki nongtrei bylla ing briew kiba la pyniasoh ialade kum ki dkhot jong ka union bad naduh u snem 2018 ka union ka pynpaw ia ki jingshem jingeh ha u myntri rangbah, hynrei haduh kine ki sngi ba mynta ka sorkar jylla ka khlem shym la leh eiei ia kane ka jingdawa jong ka union.
Ha kajuh ka por ka kong Ebina Nongkhlaw ka la bynrap ruh ba mynha u snem 2018 ka union ka la pynmih ia ka wage card na ka bynta jong ki nongtrei bylla ing briew ban pynpaw ba ka jingioh jong ki na ka kam ba ki trei bad ruh ha kajuh ka por la phah sha u myntri rangbah ban ithuh noh, hynrei haduh mynta ka union ka khlem shym la ioh kano kano ka jingpyntip ka sorkar.
“Ngi buh jingkyrpad ia ka sorkar jylla, ban kynthup ia ki Nongtrei bylla ing briew katkum ka minimum wages board bad ruh ban kynthup ia ngi ha ki scheme ba pher ba pher jong ka sorkar jylla, naduh ba baroh hi la tip ba ki mardie mar thid jingdonkam ki la kiew dor lut na ka por sha ka por” la ong ka kong Ebina Nongkhlaw.
Ka kong Ebina Nongkhlaw ka la ong ba ha ka jingrakhe ia International Domestic Workers weeks, ka union kan sa ai jingtip ia baroh ki domestic workers haba iadei ka jingdonkam jong ka social security bad maternity leave.
