Khliehriat, Naitung, 31: Ka United Hynñiewtrep Movement East Jaintia Hills District (UHM-EJHD) ha ka kyrwoh khubor ba la pyllait da u President jong ka, u Brosenly Siangshai, ka seng ka la dawa jur na ka Sorkar Meghalaya ban tuklar lem halor ka jingsniew palat jong u surok National Highway-6 ha baroh shilynter, kata, naduh Soomer West Jaintia Hills District haduh Malidor East Jaintia Hills District.
“ka surok National Highway-6, uba dei u thied snam jong ka jylla Meghalaya bad ruh jong ka kiwei pat ki Jylla ha ka thaiñ Shatei Lam-Mihngi jong ka Ri India, u la sniew sha ba palat u pud ha baroh shilynter, khamtam ha ki thaiñ Mynkre bad ha ka Nongbah Khliehriat, East Jaintia Hills. Ha kitei ki bynta, ki lah don satang ki thliew kiba ba heh bad ba la kylla long kum ki pungum pynban, ha ka por ba hap slp”, ong u Bah Brosenly Siangshai, President, ka seng.
“Ka long kaba i lehrain ban khot kyrteng ia utei u surok kum uta u surok National Highway jong ka Ri India, haba ka kyrteng bad ka jinglong jingman jong u, kam iahap satia da lei lei ruh em. Ia mynta hi, udei u National Highway tang ha ka nam ym ha ka kam pat lada ha kane ka dur”. Ong shuh shuh u kyrwoh na ka seng.
Kane ka jingsniew palat jong utei u surok, ka la buh ia ka leit ka wan jong u paidbah khamtam ha kitei ki jaka ba u la sniew sha ba palat ha ka jingeh kaba khraw bha.
Ha kiba bun ki khep, ka jingsniew palat jong utei u surok ka pynlong ia ki kali rit bad kali heh ban sniew noh hapdeng surok bad kane ka shait wanrah ia ka jingjynjar shuh ia u paidbah nongleit nongwan, na ka jingdheng kali bad ruh na ka hap shah shitom jong ki ban iaid beit lyngba jong kitei ki pungum bad ki thliew kiba heh kiba don ha utei u surok kiba lah ban buh ia ki bad ka kali jong ki hapdeng ka jingma kaba khraw.
Ka seng ka la bynrap shuh shuh shuh da kaba ong, “Lada ha kane ka dur , ka por kan sa poi ba ka leit ka wan lyngba jong u surok Bah NH-6, kan dkut syndon noh tdam lada jia ba ki bor ba dei peit ia ka bha ka miat jong une u surok kim shym la shim khia satia ban maramot noh kloi ia u. Bad ba, lada jia ba une u surok, un dkut noh, kane kan sa wanrah ia ka jingeh kaba khraw tam ia u paidbah jong ka jylla bad ruh jong ka thaiñ Shatei Lam-mihngi jong ka Ri India”.
Kumta, na ka bynta ka bha ka miat jong u paidbha baroh, ka seng UHM-EJHD, ka dawa jur na u Chief Minister jong ka Meghalaya, u Conrad K Sangma, bad ruh khamtam na ki ar ngut ki nongmihkhmat jong ka East Jaintia Hills District, kata, u Kyrmen Shylla, MLA 6-Khliehriat Constituency, kum u Minister jong ka Sorkar Jylla.
Ka seng ka kyntu ruh ka Kong Santa Mary Shylla, MLA 5-Sutnga Saipung Constituency ban shimkhia bad tuklar kloi noh halor ka jingsniew palat jong une u surok. Kane ka long katkum ka kyrwoh kaba la phah da u bah Brosenly Siangshai President ka UHM-East Jaintia Hills District.
