Shillong, Naitung 19: Ki nonghikai ha ki skul SSA hapoh jong ka lama Meghalaya SSA School Association mynta ka sngi kila leit ban ia kynduh ia u myntri ka tand pule puthi jong ka jylla u Dr RC Laloo ban dawa na ka sorkar baka dei ban pynkiewnoh ia ka tulop jong ki kumba la dep ban ia kren ha ka jingiakyn duh kaba la dep myn shuwa.
Ha ba kren ha ki lad pathaikhubor ha dien ba la dep ban ia kynduh ia u myntri ka sorkar jylla, u Bah Aristotle Rymbai president jong ka seng, u la ong ba na ka liang jong u myntri ka sorkar jylla u la iathuh ba ka sorkar kan sa pynkiew noh ia kane ka tulop jong kine ki nonghikai SSA bad kata kan long kat kum ka jingkhien snem mang tyngka jong ka sorkar pdeng kata 1tarik Iaiong mynta u snem, kaba sah mynta ka long ba ki hap ban rah ia kane kakam sha ka cabinet.
La iathuh ruh ba baroh ki nonghikai SSA ha kane ka jylla ki don haduh 12481 ngut bad na kine kiba la dep ban shah pyntbit kum ki nonghikai ki long kum ba 6000 ngut bad ki ba sah mynta ki long sa mar shiteng, kum ka seng ka kwah ba ia kine kiba dang sah ruh ka sorkar kadei ban ai lad ia ki ba kin ioh ban leit shah hikai kyrpang kat kum ki rule ba la buh da ka sorkar.
Kat kum ki rule kiba la buh da ka sorkar ka long ban hikai ha ki skul Lower Primary ki dei ban long kiba la pass ia ka Class XII bad ki dei ban pyndep ia ka jingshah hikai pyntbit kyrpang ha kane ka kam ia kaba la tip kumka Teachers Eligibility Test (TET) kane kan long kum juh ruh ia kiba hikai ha ka Upper Primary. Kiba hikai ha ki UP School ki dei ban long kiba la pass ia ka Degree.
Na ka liang jong u Bah Manbhabok Kharraswai u ba la ia don lang ha kane ka jingiakren bad ki nongthoh khubor la ong ba ka jingpan ka jong ki ha kaba ia dei bad ka jingsiew ia ki nonghikai SSA ka long T.9200/- naduh T.30,000/- ia ki LP School bad ia ki UP School kan long naduh ka T.9500/- haduh ka T.35000/- hynrei ia kane kim pat lah ban tip namar ka sorkar kam pat shim ia ka rai hapoh jong ka cabinet.
