Shillong, Naiwieng 30: Mynta ka sngi ka kynhun ki san seng “Save Hynniewtrep Mission” kaba kynthup ia ka HYC, HANM, JSM, EJNC & CORP kila phah ia ka jingthoh sha u Chief Executive Member Jaintia Hills Autonomous District Council, Jowai.
Ha katei ka jingthoh kaba kila phah ka long ba u u CEM jong ka JHADC u dei ban pynrem ia ka jingkren ba khlem nongrim Tuliram Ronghang. Chief Executive Member, Karbi Anglong Autonomous Council (K.A.A.C.) halor ka jingshah siat iap ki briew ha Mukroh.
Kane ka jingthoh kaba la phah mynta ka sngi ka long ba kitei ki san seng ki pyntip ba u Chief Executive Member, Karbi Anglong Autonomous Council (K.A.A.C.) u la thoh ha ki Social Media, kaba u la thoh “ka KAAC ka shim ia ki nongshong shnong na ka jaitbynriew Khasi Pnar kiba shong basah ha Mukroh bad lehse ha kiwei ki jaka kum ha Psiar, Khanduli bad Block-1 kum kita ki poiwir ba shong beain.
Na ka liang jongngi ka Save Hynniewtrep Mission ngi pynrem jur ia kane ka jingthoh laplah une u nongialam ka KAAC bad ka pynpaw shai ba une u briew um don jingtip eiei ruh em halor ka history bad halor ki jingshisha baroh ha kaba iadei bad ka khyndew ka shyiap ha Mukroh, Barato, Psiar, Khanduli bad Block-1.
Ym dei ban klet ba ka KAAC ka dang mih tang ha ki snem 1952 shaneng hynrei ki briew na ka jaitbynriew Khasi Pnar ki la shong Shnong ha ki thain Mukroh, Psiar, Khanduli bad Block-1 Labang Nongphyllut lah da ki spah bad ki hajar snem bad ki Khasi Pnar ha kine ki thain ki dei ki trai ri trai muluk bad ki trai jong ka khyndew ka shyiap.
Ki Khasi Pnar kim dei ki poiwir bad ki nongshong beain kumba la thoh da u Chief Executive Member ka KAAC. 2 Kumta, ngi dawa naphi kum u khlieh duh ka JHADC ba phin sngewbha ban pynrem ia kane ka jingthoh u Chief Executive Member ka KAAC bad kumjuh ruh phin shimkhia ban iada ia ka khyndew ka shyiap bad u pud u sam jong ki Shnong bad ki Elaka kiba hap hapoh ka JHADC khlem kano kano ka jingpyndem.
Ki san seng ki dawa ruh ba phin shimkhia ban ia pynbeit noh ia u pud u sam hapdeng jong ka Meghalaya bad Assam da kaba pynshong nongrim ia ka history, ki map bad ki kot ki sla jong ki Shnong bad ki Elaka kiba hap hapoh ka JHADC.
Ki san seng kila pnypaw ruh ba ki long kiba la kloi ban ia kyrshan ha ka ban iada ia u pud u sam ki Shnong bad ki Elaka hapoh ka JHADC bad ngi kyrmen skhem ba phin pdiang bad shimkhia 1a ka jingdawa jong ki, ia ka shithi la soi da u bah Robet June Kharjahrin President HYC, Lamphrang Kharbani HANM bad kiwei.
