Shillong, Naiwieng 29: Mynta ka sngi ka nongialam jong ka Congress Legislature Party ka Dr. Ampareen Lyngdoh ha kaba la synrang lang da u bah Process T Sawkmie, bah Mohendro Rapsang, President ka MPCC u bah Vincent H Pala bad Karnes Sohshang MDC kila ai da ka jingthoh sha u Lamphang ka iing dorbar u bah Metbah Lyngdoh ban dawa ba dei ban mait kyrteng ia ki 12 ngut ki MLA phet seng.
Haba kren ha ki lat pathai khubor ha dien ka jingiakynduh ia u Lamphang ka iing dorbar ka nongialam ka CLP ka Dr. Amapreen Lyngdoh la ong ba ka jingthoh kaba kila ai ka long ban dawa na u Lamphang ka iing dorbar ba dei ban mait kyrteng ia ki 12 ngut ki MLA namar kila pynkhein ia ki kyndon jong ka tenth schedule kaba dei ka ain kyntiap seng.
Ka Dr. Amapareen Lyngdoh kala kam baba kam shym don kata ka jingiapait hapoh ka seng Congress, ha kane ka jingthoh kaba la ai mynta ka sngi kila kdew shai ia ki kyndon kiba ki 12 ngut ki MLA ka seng kila pynkhein bad mynta ka shong ha u Lamphang ka iing dorbar ban shim ia ka rai.
Ka nongialam jong ka CLP ka long ba ia mynta kim pat tip ia ki daw bad kin sa tip ynda kila ioh ia ki kot ki sla na ka ophis jong u Lamphang ka iing dorbar thawain ka jylla, ha kane ka sngi la synranlang ruh da u muktiar u bah V.G.K Kynta bad ka kynhun.
Haba jubab ia ki jingkylli u President ka MPCC u bah Vincent H pala la ong ba mynta ka sngi kila ai ia ka jingujor bad kin ap ia ka rai jong u Lamphang ka iing dorbar halor kane ka bynta ha dien ba kila ioh ia ka rai kin sa pyrkhat kumno ban iaid ha kaba ia dei bad kane ka kam phet seng.
