Shillong, Jylliew 15: U myntri rangbah ka jylla u Dr Mukul Sangma mynta ka sngi u la khot ia ka jingialang bad ki heh jong ka North Eastern Railway Frontier ban ia kren halor ka jingshna ia ka lynti rel ha kane ka jylla Meghalaya, kane ka jingialang ka long kaba don kam namar la pynthut ia kane jingtrei da ki dkhot jong ka seng KSU.
Ha dien bala wai ka jingialang, u myntri rangbah haba kren ha ki nongthoh khubor u la ong ba kane ka jingthmu ban pyniasoh ia ka jylla Meghalaya lyngba ka lynti rel ka dei ka jingpyrshang kaba la bun bun snem ha kaba la shim ia ka rai ha u snem 2010-2011 ba da ka jingdon ia ka lynti rel kan iarap ban kyntiew ia ki kam jngohkai pyrthei ha kane ka jylla bad kum juh kan pynmyntoi ia ki nongrep.
Haba ia dei bad kata ka jingtieng ia ka jingwanrung jong ki briew kiba na bar na ka liang jong ka sorkar kala shim baroh ki lat ki lynti kumno ban khang lad ia ka jingwanrung ki briew kiba na bar bad ha ka jingshisha ka sorkar kala jam kham sha khmat ban ia kaba kila ia kren bad ki seng bhalang, ba ka sorkar kan buh ia ki jaka peitbniah ia ki nongrung nongmih wat ha ki station rel.
U myntri rangbah u la pynsngew ba ia ka lynti rel dei ban pynpoi sha duh Sohra tang na ka bynta ban khring ia ki nongwan jngohkai pyrthei bad ban khring ia ki nongwan jngohkai pyrthei. Hynrei kiei kiba la jia baroh ka long tang ban pynslem ia kiei kiei kiba bha tam kiba wan sha kane ka jylla Meghalaya. Ka sorkar kam shym la kynrandien na kaei kaba ka thmu.
U myntri rangbah u la ong ba dei ban peit ia kaei kaba ka sorkar ka thmu ban leh na ka bynta ka jingbha jong u ba bun balang namar ka sorkar kala ba la shah jied ha u paidbah kan leh ia kaei kaei kaba u paidbah u khmih lynti na ka sorkar. Ha kane ka jingialang u la kyntu ia ki briew jong ka Railway ba kin pynkhreh ia ka plan ban don ki jaka peitngor ia ki nongrung nongmih ha ki station rel.
