Shillong, Naiwieng 28: Ka Dorbar Shnong Umkiang, ka pynpaw ia ka jingsngewbynniaw halor ka jingbym shim khia ka Sorkar na ka bynta ban pynbha ia ka surok NH 6 ha ki thain Umkiang, East Jaintia Hills District, naduh Umkiang Pyrtakuna Kuliang, Dona bad ka thain Border Narpuh hi baroh kawei.
Ka jingbym shim khia ka sorkar ban bthah ia ka NHAI bad NHIDLC ban pynbha ia u surok NH6 ka la pynlong ia ki nongshong Shnong ban ioh pang haba ring mynsiem khamtam ki khynnah khyllung ha kine ki bnai tlang.
Nangta ki paitbah nongshong Shnong kiba don ha shilynter u surok kim lah shuh ban pynkhreh ia ka jinglehkmen Christmas namar ym long ban ai rong ne pynbha pynitynnad ia ki iing ki sem namar ka daw ka jingjur palat pum pum (dust).
Ha ka jingshisha ka don ka Company Laxmi kaba na Silchar, kaba wan trei teng teng malu mala bad kaba trei tang dep rukom bad ka khlem lah ban pynbha (repair) kumba dei ban leh. Bad haba ki nongialam Shnong ngi kylli ia ki balei kim trei bha ia u surok, ki ong pynban kim ioh pisa na ka Sorkar.
Kane ka jingbym khein snep ka Sorkar Meghalaya /NHIDCL ban shna pynbha ia u surok ka la pynkordit ia ki nongleit nongwan bad ia ki nongshong Shnong namar ki hap ban sait pliang shwa ban bam jingbam na ka daw jong u pum pum nalor ka jingbun ki Kali heh/ barit kiba iaid 24 kynta.
Bad kyntang ia wai lada ka Sorkar Meghalaya kam shym la sngap ia ka jingud jong ki paitbah nongshong Shnong ka thain Umkiang, ban pynbha ia u surok NH 6 ha kine ki sngi ban wan ngim banse ban mih paitbah sha surok, kane ka long katkum ka kyrwoh bala phah da u bah Lasting Pala rangbah shnong bad bah Nicholas Lyngdoh Secretary shnong Umkiang.
