Shillong, Jylliew 26: U bah Titosstarwell Chyne u u nongialam ka liang pyrshah ha ka ingdorbar thaw aiñ ka Khasi Hills Autonomous District Council u la pynpaw ia ka jingsngewkhia halor ka riti dustur khasi ka put ka tem bad kumta ter ter.
Haba iadei bad kane u bah Titosstarwell Chyne u la ai jingmut ia ka EC u bah Pyniaid Syiem ban shimkhia da ka ba dei ban don noh ka Traditional Institute ban neh ban sah ka riti dustur lane ka rukom tem tynrai bad kiwei kiwei ki jinglong tynrai.
Namar kiba bun ki khun samla ba mynta kim tip kim nang Shuh kumno ban tem bad kum kino kita ki tiar put tiar tem tynrai u khasi, ban don ia ka jaka ai jinghikai ka long kaba don kam.
U bah Titosstarwell Chyne u la kyntu ruh ba dei ban long pyrkhing ia ka jingpynkylla jaid tang na ka affidavits. Kumjuh ba kane ka EC ba Thymmai kan iai buddien halor ka clan bill namar kane ka bill ba la phah da ka EC ka ba rim, mynta ka dang don ha ka jingpeit bniah jong ka sorkar.
Ia kine ki mat u bah Titosstarwell Chyne ex CEM u la bynrap halor ka motion ba la wanrah da u MDC ka Shella u bah Teinwell Dkhar haka iing sdorbar mynta ka sngi.
