Shillong, Jylliew 08: Ka jingangnud jong ki paidbah ban iohi ia ka surok 4-lane na Anjalee Petrol Pum sha Sawdew kaba 11 km kan dang shimpor namar ka kompeni SS Infrazone Private Ltd kaba la ioh kontrak ban shna ia kane ka surok kala phet noh bad ka jigntrei kala sah kut mynta.
Katkum ki thymmei khubor kiba la ioh da u SP News Agency kiba ia jan bad ka National Highway Infrastructure Development Corporation Limited (NHIDCL) la pynthikna ba katei ka kompeni kaba ioh ia ka bynta kaba nyngkong ban shna ia kane ka surok bah 4-lane na Anjalee Pump sha Sadew ha Pomlum kala mih noh bad kam treh trei shuh ia kane ka jingtrei.
Ki thymmei khubor ki iathuh ba ki daw kiba ka kompeni kala ai ba ka hap ban sangeh noh ia kane ka jingtrei ka long, ka jingbym lah ban trei namar ka jingpynkylla ia ka jingpyniaid ia ki pipe um jong ka PHE kaba dang trei mynta ruh namar katba ym pat lah ban pyndep ban pynshong ia ki pipe um yn nym lah ban trei.
Ka jingpynslem jong ka MeECL ban pynkynriah ia ki dieng eleltrik kiba don ha ki bynta ba ka surok 4-lane ka dei ban iaid, kane ruh kala long kawei pat ka daw ba ka kompeni ka hap ban sangeh noh ia ka jingtrei namar ym lah ban shna ia ka surok khlem da pynkynriah ia ki dieng eletrik.
Kawei pat ka daw ka long ba ha dien bala sdang ia ka jingtrei mih ki mukot duma ha kaba ia dei bad ka jingshna ia kane ka surok bad kine kila pynslem ia ka por ha kaba ka kompnei kan nym lah ban pyndep ia ka jingtrei ha u Nohprah 2023 kumba la buh namar kitei ki daw kiba la kdew.
Kitei ki jingpynslem baroh ka ktah ruh ia ka por bad ia ka dor jong ka jingtrei ha kaba ka kompeni kan nym lah shuh ban pyndep ia ka jingtrei ha ka dor T. 91.26 klur ia kane ka surok 4-lane kaba 11 km, na ka liang jong ka NHIDCL mynta ka dang pynkhreh ban khot tender biang ban shna ia kane ka surok, la pynthikna ba ka juh ka kompeni kan nym ioh shuh ia ka jingtrei.
Haba ia dei bad kane ka surok ka sorkar Meghalaya ka tip bha bad u myntri rangbah ka jylla u Conrad K Sangma u la shim khia da lade ban khot ia ki jingialang ban iakren kumno ban weng ia kine ki jingeh ban dup lah ban pyndep noh ia kane ka surok.
