Shillong, Naitung 10:Watla ki bank ki la pyntreikam ia ki Auto Trailer Machine (ATM) ha ka jylla bad ka ri hi baroh kawei na bynta ban pynsuk ia ki paidbah kiba kynshew pisa ba kin lah ban sei pisa ha kano kano ka por ba ki donkam, hynrei ki paidbah ka thain ri sepngi ki dang kynduh jingeh haba ki donkam ban sei pisa na ka State Bank of India (SBI) branch kaba don ha Patharkhmah.
La ioh jingtip ba ki paidbah ki ieng lain ban ap la ka pali ryngkat ka bah la ki khun kaba long thik kumba iaknieh tiket cinema nalor ka jaka kaba khim sa ka jingbun briew kiba wan donkam ban thep ne sei pisa, kam long shuh kaba itynnad ka rukom treikam ha ha katei ka bank ha kaba ki paidbah ki hab ban ieng lain da ki bun bun kynta bad la ong ruh ba teng teng ki hab ban pynlut por ar lai sngi haba ki donkam ban sei pisa na katei ka bank.
Kawei pat ka jingeh ba ki paidbah ki iakynduh haba ki leit ban sei pisa, la ong ba katei ka bank kam ju don pisa jan man ka por kumta ki hab ban pynlut por kumba lai saw sngi ban pyndep ia ka kam bad kane ka la ktah ia ki paidbah khamtam kito kiba wan na ki shnong kiba jngai nalor ka por ki hab ruh ban pynlut pisa na bynta ka bai leit bai wan bad kumta ter ter.
Halor kane, ki la kyntu ia ki heh ka SBI kan buh da ki ATM ha ka Patharkhamh branch kumba leh ha kiwei ki jaka bad kumjuh ruh ban pynheh shuh shuh ia katei ka ophis jong ka khnang ba ki paidbah kin suk haba ki leit ban pyndep ia ki kam ki jam jongki ha katei ka bank.
Haba iakren ba ki nongtrei katei ka bank ki la pynpaw ba ki shem jingeh ban pynbiang ia ki paidbah namar ba ki nongtrei ki dang duna kumta ki kyntu ia ki paidbah paidbah ban iai shah shitom lem shipor.
Iathuh ba ki nongtrei ha ki don tang kumba 6 ngut ki staff kynthup ia u Branch Manager, lai ngut cashier uwei field ophisar bad u chawkedar.(SP News)
