Shillong, Rymphang 18: Ha dien ka jingialang kaba la neh haduh san kynta jong ka seng United Democratic Party (UDP) ban ia kren halor ka jubab jong u nongialam ka People Democratic Forum (PDF) u Bah PN Syiem hapoh jong ka KHADC, kum u CEM, ka rai kaba mih na kane ka jingialang ka long ba kin ap haduh ban da sdang ka dorbar mang tyngka ka ban long ha ka 20 tarik mynta u bnai.
Ka UDP kala pan jingpynshai na u Bah PN Syiem halor ki khyndai tylli ki Mat bad na ka liang jong u CEM ka KHADC u Bah Syiem u la phah da ka jingthoh sha ki MDC jong ka UDP, ha kaba u la ong ba ia ki phra tylli ki mat la dep ban ia kren ha ka ExeCutive Committee bad ha ka jingialang jong ka PDF bad ki MDC(S) na ka UDP kin sa ia pynshai hala ka jong ka Party.
Na ka liang jong ka UDP, halor katei ka shithi kala ia kren hapoh jong ka Sub Committee ha kaba u Dr Jemino Mawthoh u long u Secretary, ha kane jingiakynduh ka jong ki kaba la long ha iing sah jong u president jong ka seng u Dr Donkupar Roy kaba la neh haduh san kynta ei ei hynrei kim shym la lah ban shim ia ka rai la kin dang kyrshan ne weng noh na ka PDF ka EC kaba ki trei lang hapoh ka jingialam jong u Bah Syiem.
Haba u wei na ki MDC jong ka UDP haba kren ha u SP News Agency u la ong ba ha ka jingialang kaba la long ha ka sngi thohdieng ha iing jong u president ka seng kim shym la lah ban shim ia kano kano ka rai, hynrei kila shim tang ia kawei ka rai ba kata kin ia ap haduh ban da long ka dorbar mang tyngka jong ka KHADC ka ban long ha ka 20 tarik mynta u bnai.
Ha kane ka jingiakren jong ki MDC ka UDP kila ia tai sani ruh halor ka jingjubab jong u nongialam ka PDF namar ha ka shithi jubab kaba u la phah sha u Chairman jong ka United Democratic Party jong ka Parliamentary Party, na ka liang jong u CEM jong ka KHADC kum u nongialam jong ka PDF u la thoh shai bha ba ki MDC (S) na ka UDP kin hap ban pynshai hala ka jong ka party.
