Shillong, Kyllalyngkot 31: Mynta ka sngi ka seng Hynniewtrep A’chick National Movement (HANM) kala leit ban pynlong ia ka jingialang paidbah hapoh iew Nongspung ban pynshai paidbah halor ka jingma kaba ap na ka Citizenship Amendment Act 2019 bad ka jingdon kam ban ioh ia ka Inner Line permit hapoh jong ka jylla Meghalaya.
Haba kren ha kane ka jingialang pynshai paidbah na ka liang jong u Bah Louis Dohtdong Assistant Secretary jong ka seng, u la kyntu ia ki paidbah ba kin ai ka jingkyrshan ia ka kynhun COMSO ha kane ka jingialeh ban pynioh ia ka ILP hapoh ka jylla Meghalaya.
Haba batai shaphang ka ILP u la ong, la da ioh ia ILP ka jingiada kam dei eh tang na ka jingwan ki briew kiba na bar hynrei kan khanglat ruh ia ki heh spah kiba kwah ban wan sha kane ka jylla ban kjit ia ka spah na kane ka jylla Meghalaya. U la kyntu ia ki kmie ki kpa ba kin ailad ia ki khun samla ban ia don bynta lang ha ki seng bahlang.
Kiwei kiba la kren ha katei ka jingialang paidbah ki long u bah Boby Basaiawmoit, u nongialam jong ka HYC bad ki nongkit kam shnong katei ka thain. Ha ka jingkren jong ki kila pynpaw ba kim kwah ba ka CAA kan trei kam hapoh ka jylla Meghalaya bad ki dawa ba ka sorkar ka dei ban pyntrei kam noh ia ka ILP hapoh ka jylla.
Ha kane ka sngi ki paidbah kiba wan iew hapoh iew Nongspung kila ia poi lang sha kane ka jingpynshai paidbah ban sngap ia kaei kaba ki nongialam jong kitei ki ar tylli ki seng bhalang ki pynsngew halor ka CAA bad ia ka ILP.
