Shillong, Naiwieng 13: Shwa ban rung sha Iewduh na sha ka liang Motphran ne Mawkhar,phin iohi ka jingthoh ha Khilon(arch) kaba thoh shai,’ Kamai ia ka Hok’.Ki don ruh ki dur ki nongiew, ki nongdie nongthied bad ki nongiaid ki nongieng lem bad ki nongpeitkai ba i sammut ba laiphew jait.
Bun ki paidbah kim ju kloi pyrkhat satia ia ka jingmut ba shisha jong kitei ki jingmut jong kitei ki kyntien bad wat ki nongpyniaid jong katei ka Iew ruh kim poi pyrkhat ba katei ka kyntien ka kren bad phalang pynban da kumwei pat.
Ka dei ka Hok jong uno uno u briew ne ka briew ba kin kamai ha iew ha hat.Ka dei ruh ka hok jongki ba kin ia die ia thied ia la ki tiar ki tar ne ki mar ki mata jongki.Ka dei ruh ka hok jongki ba kin ia kamai kajih katba ki lah ei ha katei ka iew ba heh tam ka ri Khasi-Jaintia jongngi.
Hynrei,kumba ioh lem ki nongdie ki nongthied,ki nongdie kyiad bad nongdie drok ruh ki don lem kajuh ka Hok ha katei ka iew kumba la thoh ne bthah da ki bor pyniaid jong katei ka Iew.
Kumba don ka hok ia ki nongdih sha ne nong bamja ha ki dukan bapher bapher,ki nongdie kyiad ne nongdie drok ruh ki don kajuh ka hok ha katei ka iew.Ym tang ban die ne ban thied hynrei wat ban bam ban dih ruh ki don kajuh ka hok kumba long lem kiwei kiwei ha katei ka iew.
Ki bam ki dih kyrhai katba mon namar ka dei ka hok jongki.Ki nongdie jingdie ha ka dukan bapher bapher ruh ki don ka hok ban shukor ne leh thok ia ki nongthied namar ki ruh,ka dei ka hok jong ki ban ioh kamai shibun shibun.
Kaba kham shyrkhei eh ka long ba,wat ki nongtuh,ki nonglute bad nongkloh pla pisa ruh ki don kyrhai ha katei ka Iew bah namar, ki ruh, ki kamai lem ia kajuh ka hok jongki kumba kamai lem kiwei tangba dei ban ia nang hi ban ia husiar ia la ka jong ka jong ka pisa,ka tiar ka tar ne ia la ka jong ka mar ka mata ioh shah tuh ei ia ka hok jongphi ha kiwei.
Tip shuh, sha ki jaka ba kham kyndong lei lei jong katei ka Iew bah,kin ia leh ka hok aiu ym nang batai shuh.Ki jait jingia kamai hok ba laiphew jait kin don beit ha katei ka Iew.Hato,lah ban khang ia ka hok shi met(private right) jong uno uno u briew ne kano kano ka briew?
Ha ka jingshisha,ka Hok bad ka Sot kadei ban ia iaid lang ryngkat ryngkat kumba iaid lang ka Hok bad ka pap.Lada phi kamai ia ka Hok ka bym dei, kata, kalong ka pap ka ban tim iaphi ha ki sngi kiban wan.Ha kito kiba nang ban leh thok, kata ka kam shukor jongki ka kylla long hi ka kamai ia ka hok jongki.
Lada kim nang pat ban leh kumta, kim lah satia ban pynroi ia ka spah ka hajar,ka lak ka klur jongki.Tangba dei ban kynmaw kein,ba ka jingbishar kan don beit ha kaba kut ia kito kiba kamai ia kaba hok bad kito pat kiba kamai ia ka bym hok ne ka pap.
