New Delhi, Nohprah 08: Ka tnat Rural Development ka la sdang ia ka PradhanMantri Gram SadakYojana (PMGSY) kum ka sienjam ba kyrpang kaba shisien ban wanrah ia ka jingiasoh lyngba ki surok ha ki jaka nongkyndong.
Ka jingshna ia ki surok ka long ba lyngba kawei ka surok kaba lah ban pyndonkam baroh shi snem, sha kito ki jaka sah briew ki bym lait kali kiba don ka jingdon briew 250 bad kaba kham bun ia kane.
Kane ka long naka bynta ka thain shatei lam mih ngi katkum ka khanasamari 2001 ban kyntiew ia ka ioh ka kot bad ka imlang sahlang jong ki briew kiba sah ha ki jaka nongkyndong.
Ia ka kam jong ka PMGSY la pyniar ban kynthup ia ki sienjam ba thymmai. Ia ka PMGSY-II la sdang ha u snem 2013, da ka jingthmu ban kyntiew kyrdan ia 50,000 Km ki surok ba la don lypa ha ki jaka nongkyndong.
Ia ka PMGSY-III la sdang ha u snem 2019 ban wanrah sa 1,25,000 Km lyngba ki lynti bad ki jaka pyniasoh hapdeng ki jaka shong briew, kaba mut ki iew mar rep Gramin, ki skul Higher Secondary bad ki Hospital.
Katkum ki mat treikam jong ka PMGSY, ki surok ha ki jaka nongkyndong ki dei kiba hap peit da ki Sorkar Jylla kiba long ki nodal agency ban pyntreikam ha ka jylla.
Shuh shuh, ka mat jong kane ka prokram ka dei ka jingsah briew, kaba mut ka jingdon lang ki briew ha kawei ka jaka bad ki bym mih na kane ka juh ka jaka katba dang kylla ka por.
Ha jylla Meghalaya, 481 tylli ki jaka sah briew ki dei kiba la pyniasoh na ki 602 tylli ki jaka sah briew kiba la sanction na ka bynta ka jingpyniasoh hapoh ka PMGSY. Ka MDoNER ka kyrshan ia ki jingpyrshang jong ka Sorkar Jylla .
Ki tnat Sorkar Pdeng kiba don kti ha kane ka kam ban wanrah ia ka jingiasoh ha ka thain shatei lam mih ngi kaba kynthup ia ka jingshna ia ki surok sha ki jaka kyndong kynshrot kaba iarap ban plie ia ki lad na ka bynta ki riewlum kiba sah ha ki shnong kiba rit bad kiba shem jingeh ban poi.
Ki surok baroh ba la mang hapoh ki Skhim ba kongsan jong ka MDoNER kiba long ka – North East Road Sector Development Scheme (NERSDS) bad North East Special Infrastructure Development Scheme (NESIDS) ki la pyntrei kam hi lane lyngba ka North Eastern Council (NEC), haduh 169.51 km ha kine ki lai snem ba la dep ha ka jylla Meghalaya.
Shuh shuh ka tnat Border Management, jong ka tnat kam pohiing ka la shim 992 tylli ki skhim ha ka thain shateilammihngi, kaba kynthup ia ka Meghalaya hapoh ka kam ban shna ia ki surok bad ki jingkieng, naduh u snem 2014-15.
Ia kane la pyntip da u Myntri Sorkar Pdeng ba dei khmih ia ka tnat Development of North Eastern Region, u G. Kishan Reddy ha ka jingai jingthoh ha ka iing dorbar thawain RajyaSabhamynta ka sngi.
