Shillong, Jymmang 19: Ha ka Lyngkhuh Shispah Snem jong ka St. Edmund’s College, ka Khasi Department ka la pynlong ka pyninam durim ka ba kyrteng “Apot” ba la pynmih bad lamkynto da u Bah Raphael Warjri.
Ha kata ka sngi, u Bro Simon Coelho, Principal u la long u Kongsan bad u la pyllait ia ka thup sahnam ‘Rynsan’ bad iaroh ia ka Khasi Department ka ba la maitphang kum kine ki kam ki ba myntoi ia ki samla pule.
Ki kynrem lyndan ba la ia don lang ha katei ka sngi ki long u Bah R V Warjri, Prof Antionette Kharmalki na Khasi Department NEHU, Padmashree Kong Patricia Mukhim, Taithoh kotkhubor, The Shillong Times, Bah Bobby S Basan, Khliehduh jong ka Khasi Department bad ki para nonghikai.
Ha ka ba sngewnguh artat ia ka Riti Academy, u Bah Bobby S Basan u la kyntu ia la ki samla pule ban khmih sani ia ka durim khnang ban pynkhraw ia la ka jingtip ha ki liang bapher bapher.
La pynithuh ia u Bah Raphael Warjri kum u Lamkynto Durim da u Dr Ronald P Kharshiiing, u nonghikai ha College bad u Saiñpyniar jong ka Synjuk ki Nongthohkot Khasi ne Khasi Authors’ Society.
Ka durim Apot ka dei ka ba la shna katkum ka khanatang shaphang u Tiewlarun ba la sot na ka u Rabon Sing Kharsuka, hynrei la pynwandur hi da u Lamkynto katkum ba dawa ka khana khlem da kynriah na ka pdeng khana puriskam.
Kumta ym shym la kyndat ia ka khana pdeng, hynrei la bynrap ki snap jong ka deiti Khasi ki ban pynphuh pynphieng ia ka durim. Ka ktien durim bad ka pharshi jong ka khana puriskam ka dei ka ba la pynbit pynbiang hi da u Bah Raphael Warjri.
Ha kane ka sngi la don ryngkat ba ia syllok bad u Rembrandt Iakmenlang Kharnaior, Lamkynto Durim bad u Bah Banjop Leo Kharmalki, Symbud nongkyrsei.
Ki ba la iadon lang ha katei ka sngi ki long ki tyngshop bad puron, Synranki Najiar bad Darhun Marbaniang, ha ka ba la ioh ban ia pashat jingmut lang bad ki samla pule jong ka College.
