Shillong, Jymmang 08: Ka Marynthing – Ka snap paka ha ka sngi saitjian kala pynkut noh ia ka rynsan iakop pyni riam Khasi tynrai 2022 ha ka jingdon sakhi u samla Pynshai Rani, Publicity Secretary Khasi Students’ Union (KSU) u ba lah wan long kum u kongsan ha katei ka sngi.
U bah ES Majaw i trai ka Ri Khasi Book Agency kum u symbud kongsan, u samla Shanbor Khongjah uwei na ki nongkitkam bahakhmat ka Seng Khasi Sengraij uba long u nongshah khot kyrpang bad kiwei pat ki nongshah khot sngewbha.
Ha katei ka sngi, la sam ruh ia ki Khusnam sha ki Nongjop baroh bad ia Nongjop ba nyngkong kum ka Lahduh ha ka Jingiakop pyni riam tynrai ka dei ka samla Monalisa Wankhar, kaba lah iohrah ia ka Khusnam bad ka buskit song pisa kaba 15,000 /- .
Ka nongjop ba ar ka dei ka Lidaris Lyngdoh Lyngkhoi i ba lah iohrah ia ka Khusnam bad ka buskit song pisa kaba 10,000/- bad unongjop ba lai u dei u heprit Dasanjanai Rani i ba lah ioh rah ia ka Khusnam bad ka buskit song pisa ba 5000/-.
Nalor kitei ki don sa 10ngut kiba ioh ia ka khusnam kaba kyrpang 1000/- marwei kata Valarie Nongkhlaw, Rifellda Langstang, Lili Mary Khyndeit, Alfonso Jaiden Khongwar, Daisy Kharsyntiew, heprit Naphisabet Chyne, heprit Deiti Fairy Nongdhar, Ruki Toi, heprit Sara Dkhar bad heprit Damangkyrpang Nongdhar.
Ha shuwa ban sdang ia ka jingsam Khusnam lah ioh shuwa ka jingkren lyngkot ia u symbud kongsan, Bah ES Majaw ha kaba i lah pynpaw ia ki kyntien kordor kyntien shongsbai kiba ai mynsiem ia ka marynthing- ka snap paka ia ka jingpyrshang shitrhem ban trei ia ki kam babha kiba kyrsiew thiah shisha ia ka jaitbynriew bad khamtam ia ka jinglah katei ka kynhun ki samla ban pynlong ia kane ka rynsan iakop pyniriam Khasi tynrai 2022 kaba jop bad iphuh iphieng.
Shuh shuh i bah ES Majaw i lah ai mynsiem ia ki samla ha katei ka sngi ba ki dei ban pynneh ia la ka jong ka riam Khasi tynrai bad iala ka jong ka ktien ka thylliej ka akor ka burom bad ban ialeh nabynta ka hok longtrai jongngi kum ka jaitbynriew da kaba pynpaw ba kum ka jaitbynriew ngi don ia 3tylli ki bynta ba Kongsan ban pynithuh kyrpang ia ngi kata ka long ka snam, ka ktien bad ka deiti kolshor.
Kine ki lai tylli ki long kiba khraw bad ba kongsan eh haba u Blei nongbuh nongthaw u lah ai kyrpang hynrei lada ngin husiar bha ngin sa jot namar ki don shibun kiba ap thap ban knieh noh ia ka hok longtrai jongngi na kata ka daw ngi dei ban lok kiba adkhar bad phikir bha da kaba sumar sukher bad ban pyneh ia la ka jong ka riti ka dustur haba ngi ong ngi ieid ia la ka jong ka Ri.
Na ka liang itei i riew rangbah i lah pynpaw ba ka Ri kadei ka khyndew ka shyiap bad ka khyndew kadon ha nga bad phi kumta lada ngim nang ban sumar ia kaba u Blei u lah ai ia ngi ja jaitbynriew, kumta khlem pep ka jingtim bad jingjot kan wan ka hap ym tang ha ngi hynrei kaba kham kordit ha ki pateng bahadien.
La bynrap shuh shuh da kaba ong ba ngim dei ban ailad ia ki nongwei ba kin wan knieh ia ka khyndew ka syiap, ban pynjaboh ia ka snam ban ban tuh noh ia ka ktien bad ka kolshor tynrai jongngi, i lah pynkynmaw ruh ia ka jing kren u John F Kennedy President barim ka America kaba ong ” Wat ong aiu ka ri kan leh na bynta jong ngi, hynrei to kylli aiu phin leh na bynta ka Ri”.
La pynkut da kaba ong kane ka bynta kaba ka marynthing- ka snap paka ka pyntyllun ka long ka ba donkam bha ia ngi kum ka jaitbynriew bad ka don ka jingkyrmen kaba Khraw ban kyrsiew thiah biang ia ngi kum ka jaitbynriew kumba u myllung Soso Tham u ong “Sashisien kin win ki maw, sashien kin khih ki khlaw” bad i ai khublei kyrpang eh ia ki samla kiba la pynkhie im biang iaka riam ka beit tynrai u Khun Khasi kaba lah sdang shah tyllep ha ki riam nongwei ba kynsha bad khlem akor.
Katba, na ka liang u samla Pynshai Rani, Publicity Secretary KSU uba long u kongson ha katei ka sngi u la ong ba ka marynthing- ka snap paka ka long kawei na ki nuksa kiba bha tam nabynta ban pynneh pynsah bad pyneh rngiew ia ka riam ka beit bad ki deiti tynrai u Hynñiewtrep Hynñiewskum.
Shuh shuh u lah pynpaw ba na ka liang jong ka seng KSU ruh ki ju pynlong ia kum kine ki jait rynsan ha ka liang ka riaw ka siaw ka put ka tem bad ka riam ka beit khnang ban kyntiew ia la ki jong ki paradoh parasnam bad ban pyneh iala ka thymmei bad ka snap tynrai ba kyrpang jongngi kum ka jaitbynriew.
Ha kane ka sngi u lah pynpaw ia ka jing ai khublei kit bok kit rwiang ia ki samla nongpyniaid ka marynthing- ka snap paka ia ka jingmih shakmat jongki ban pynneh pynsah ia ka deiti tynrai u Hynñiewtrep lyngba ka juk teknoloji ban pyntyllun ruh ia shibun kiei kiei kiba ai jingmyntoi ia ka jaitbynriew bad khamtam ka jing pynlong ia kum kane ka rynsan iakop pyni riam Khasi tynrai da kaba ong ba kum ki jait rynsan ki wanrah ka jingmyntoi kaba khraw namar ki nong ia shim ki lah ban pyni sarong iala ka jong ka riam ka beit tynrai.
Kiba wan ia shimbynta ha kane ka jingiakop ki long na ki dong ki thaiñ bapher bapher kaba pynpaw ia ka jingriewspah ka riam ka beit jongngi ki Khun Khasi-Khara.
U lah pynkut da kaba ong ba ka jingmih ka marynthing- ka snap Paka ka long shi bynta kum ka kabu ksiar ba ngin ithuh ia ka ia ka riam ka beit na kylleiñ ki shnong ki thaw, ki dong ki thaiñ bad pynpaw sha ka pyrthei ia ka jingriewspah ia ka jingriewspah jongngi bad khamtam eh ban hikai ia ki samla ba kin nang ban ieid ban tyngkai iala ka jong ka Ri Hynñiewtrep ka Jaitbynriew Khasi-Khara.
Kyntang iawai u samla Pynshai Rani sa shisien u la ai khublei kitbok kir rwiang ia ki samla bad ka marynthing- ka snap paka ba kin nang kiew nangkiew irat shaphrang ha ki kam kiba bha eh nabynta ka jaitbynriew, u lah pynkut da kaba ong “Ka riam ka beit kadei ka atiar ban pyni ia ka jinglong kyrpang jong ka jaitbynriew namar ba ka burom ka akor bad ka ijot ka jong ngi ka jaitbynriew ka pyni ia ka riam ka beit namar lada ngi tbeh noh ia ka rongphong pyrthei ka mut ba ngi i beiñ noh ia ka rympei lajong kaba ka mei ïawbei bad u pa Thawlang saiñdur ha ngi naduh nyngkong ki sngi”.
Ka jingkren khatduh ia u samla Shanbor Khongjah, uwei napdeng ki nongkitkam ba pawkhmat ka sengkhasi sengriaj da kaba u lah pynpaw ia ka jingsngew bynniaw ia ka jinghiar dor jong ka riam Khasi ha kum kane ka juk ba mynta ha kaba na ka liang jongngi kum ka jaitbynriew ngi niewpoh bad ibein iala ka jong hynrei ngi sngew sarong ban tyrneng rongphong ia ka jong kiwei.
Na ka Liang utei u samla u lah ong ba kiba bun na ki samla jongngi kiba pule ne trei sha bar jongka ka Ri Khasi ki lehraiñ ban phong ia ka jaiñsem ka kyrshah hynrei ki sngew khyllew ban pyrthuh bud ia ka riam ki nongwei kaba pyllait lut ia ka met ka phad bad i khlemraiñ.
Shuh shuh u samla Shanbor Khongjah u pynpaw ban jer ia ka jingriam kiba pher bapher katkum ki dong ki thaiñ bad ki khor ki khriam kiba don ha ka rynsan u Hynñiewtrep Hynñiewskum. Khatduh u lah pynpaw ba ka jingmih ka marynthing- ka snap paka kan sa kyntiew shisha nangne shakhmat ia ka Riam ka beit bad ka akor burom ka Bri u Hynñiewtrep.
Hadien ba lah pyndep ia ka jingsam ia ki Khusnam sha ki nongjop lah ioh ka jingkren pynkut ia katei ka rynsan iakop pyniriam Khasi tynrai 2022 na u bah Micky Jones Kharbangar da kaba pynpaw ba la seng nyngkong eh ia ka marynthing- ka snap paka ha ka 1tarik, nailar 2019 nabynta ka jingthmu babha ban bsut ia ka mynsiem ieid Ri, ban ieid iala ka deiti tynrai bad ban ai ki kyntien Sneng kyntien Khraw nabynta ban tei ia ka lawei ki Khun samla ka Ri ka jaitbynriew.
Ha ka juh ka por u lah pynpaw ba ka marynthing- ka snap Paka ka pynpaw ia ka jingsngewnguh ia i Paiem Ainam Manik Syiem bad ka Dorbar u syiem Hima Mylliem namar ka jingai jingithuh kyrpang (Special Recognition ) ia ka marynthing- ka snap paka kum kawei na ki rynsan ka ban pynneh pynsah ia ki riti dustur, ki kolshor tynrai ka Bri u Hynñiewtrep kumba lah buh lasat da u Ñi ki tymmen ki san naduh hyundai hynthai.
Khatduh ka marynthing- ka snap Paka lyngba u bah Nang-oo Sari ka pynpaw ia ka jingai khublei sngewnguh ia baroh kiba lah iarap pynlong ia kane ka rynsan iakop pyni riam Khasi tynrai 2022 kaba iphuh iphieng bad kaba jop, u lah pynpaw ia ka jingsngewnguh bad ai khublei ia baroh ki nongiashim bynta, ki nong iarap synñiang bad khamtam eh ia ka Khasi Students’ Union kaba lah ai ka jingkyrshan kaba ratbah ia kane ka rynsan iakop pyni riam Khasi tynrai 2022 jongka marynthing- Snap Paka.
