Shillong, Jylliew 09: Ha ka sien ba nyngkong hadien ka jingwad bniah ka jingiakhih, ka jinglum kot kaba la arphew snem bad hadien ka jingiakynduh saw sien ka Advisory Committee, On Legislation and Legal Issues, ka la shim ia ka rai ban khot ia u Bah John F Kharshiing, Spokesperson, Federation of Khasi States, & Chairman, Ka Dobar Ki Khlieh Nongsynshar Ka Ri Hynniewtrep, hakhmat ki long heh KHADC mynta u bnai.
Ia kane ka jingiakynduh lang la pynlong ha Conference Hall, KHADC, ban ai jingpynshai (power point presentation) halor ka Instrument of Accession and Annexed Agreement 17 August 1948, ha ka jingialang kaba la pyniaid da u Bah Pynshngainlang N Syiem, MDC, Chairman, KHADC, ha ka jingiadonlang i Bah Teinwell Dkhar, MDC, Chief Executive Member, KHADC, Bah Pyniaid Sing Syiem, MDC, Deputy Chief Executive Member, KHADC, Bah Titosswell Chyne, MDC, Executive Member, Bah Martle N Mukhim, MDC, Executive Member, Bah Lambor Malngaiang, MLA & MDC, Chairman, Advisory Committee, Administration and Financial Reforms.
U Bah Sherbolang Mawlong, MDC, Chairman, Committee Youth Affairs, Bah M Kharkrang, Secretary, Legislative, Bah Lamphrang Blah, MDC, Leader Opposition, Kong Grace Mary Kharpuri, MDC, Shri. Ronnie V Lyngdoh, MDC, Bah Fantin Joseph Lakadong, MDC, Bah Gabrial Wahlang, MDC, Bah Bajop Pyngrope, MDC, Bah Carness Sohshang, MDC, KHADC, u Bah R. Kharjarin, Pleadar KHADC, Dr S Lamare, bad Dr B.L. Nongbri, ki dkhot (Member), Advisory Committee, On Legislation and Legal Issues bad kiwei ki officer KHADC.
Ha katei ka jingialang, ha kaba plie ia ka jingialang u Bah PN Syiem, Chairman, KHADC, u la pynsngew ba ka por ka dawa ban wad ki lynti ban thaw ki lad ki lynti kumno ban ioh jingshai bad jingiada halor ki hok jong ka jaidbynriew bad ha kaba u la pynsngew ba kawei na ki lynti ka long ban bishar bniah halor ki dulir iateh bad ki dulir kular (Instrument of Accession and Annexed Agreement) kaba la soi bad mynjur ka Sorkar India bad ka Federation of Khasi States, ha ka 15 December 1947 bad 17 August 1948 ha shuwa ka 26 January 1950 ba la pynjari ia ka Constitution Ri India bad ban bishar lada kane ka dulir ka dang im ne ka la iap khnang ban sngewthuh kumno kan iada ia ngi nalor ki kyndon Sixth Schedule.
Ha katei ka jingialang na ka liang u Bah John F Kharshiing, u la pynlait ha ka sien kaba nyngkong ia ka shithi jong u Sir Akbar Hydari, Governor Assam sha u Shri. Jawaharlal Nehru, kaba kren shapang ka dulir IOA & AA kaba long ruh kum ka Standstill Agreement kaba la ia mynjur bad ki Hima Khasi States – Ka Federation of Khasi States, ha ka 16 July 1947 kaba kren shai ba kan neh tang AR SNEM, bad u la pyni ruh ia ka IOA & AA kaba 9 tarik August 1947 bad ka IOA & AA kaba 17 August 1948 kaba la mynjur da ka Sorkar India hynrei kaba la weng noh ia ki kyntien AR SNEM.
Wat hadien ba la ia soi ia kitei ki dulir hapdeng ki jingshah byrngem ki Khlieh Nongsynshar ki la lah ban ksoh ia ki kyndon lyngba ka Annexed Agreement, hynrei ha ka juh ka por u la pynshai ba ka jaidbynriew khasi ha ki snem 1947 ka la kad ar liang kawei kaba la lam khmat ki Khlieh Nongsynshar bad ha kawei ka liang kaba ialam da u Rev JJM Nichols Roy, uba la dei ruh ha ka jingshisha u Secretary uba nyngkong jong ka Federation of Khasi States.
Kumno la leit mih ka jingiapher jingmut ym nang sngewthuh hynrei kumba ka paw u Bah JJM Nichols Roy u la pyrshah namar la mih ka jingong ba dei tang ki 25 Hima Khasi States, kiba la soi ia ka IOA & AA katba ki British Sirdarship kiba rit kiba tang shi shnong, lane lai Shnong, kumba 29 tylli bad ki 19 Elaka Jaintia Hills kim shym ioh ka kyrdan IOA & AA, bad ka jingthmu jong u Rev JJM Nichols Roy ka la long ban ioh ia ka jingsynshar kaban pyntylli ia baroh ki jaka kynthup ki Hima Khasi States, ki British Sirdarship bad ka Jaintia Hills.
Ha ka juh ka por u la long u nongmihkhmat uba la ioh leit mih khmat sha ka Constituent Assembly bad u la long uba jan ia u Premier Assam u Gopinath Bordoloi, Kumta wat lada ia katei ka dulir la dep mynjur da ka Sorkar India, hynrei namar ki jingsuh buit ka ka Assam kim shym ailad ia katei ka dulir bad ki la pynrung jubor ia ki 25 Hima Khasi States hapoh ka Sixth Schedule hapoh ka jingsynshar ka Assam.
U Rev JJM Nichols Roy, u la pynpaw ia ka jingbabe ba ka jingkthang ia katei ka jingleh donbor ka Sorkar Assam ha kaba u la pynpaw ba ki la pynkylla ia ka draft bad ka jingai jingmut ka Sub-Committee, Drafting Committee, Constituent Assembly, ha kaba u Bah JJM Nichols Roy u la pynpaw ia ka jingbitar ba ki rangbah nongialam Assam ki la bsuh kyndon ba ka Sixth Schedule kan long hapoh ka jingkhmih ka jylla Sorkar Assam ym kumba mut u Rev JJM Nichols Roy, ba ka Sixth Schedule kan don ka jingiadei kaba kyrpang bad ka Sorkar India kumba la kdew ha ka IOA & AA.
U Rev JJM Nichols Roy, u la ong ha ki jingthoh jong u ba namar u la shah shet bad u la kylla long tang marwei kum u riewlum um shym don lad bad leh da kumwei bad ban shu pdiang beit ia kaei kaba la pynkylla ka Sorkar Assam. Katba ha kawei ka liang u Sayeed Mohammed Sadulla, u Premiere Assam (uba ngi khot Chief Minister hadien ka 1950) ha ka jingkren jong u hapoh Parliament ha ka juh ka por ba pynskhem ia ka draft Sixth Schedule u la ong ba kane ka jingleh donbor ia ki Hima Khasi States kan wanrah jingeh hadien habud ia ka Sorkar India, bad u la kyntu ia ki dkhot ka Constituent Assembly kiban sa bteng hadien ka 1950 ba kin pynbeit bad pyndep ia ki jingiakut ki jingkular katkum ka IOA & AA.
Kumta, u Bah John F Kharshiing, u la kren skhem ba ka IOA & AA ka dang im bad ka Sorkar India kam don lynti lait na kaban pyntreikam ia ki jingiateh ki jingkular baroh ha kaba kan mih ka Sorkar jong ka Federation of Khasi States. Shuh shuh haba jubap halor ka jingkylli balei bad kaei kaba pynlong ia ki Khlieh Nongsynshar ki Hima Khasi States ban pyrshah ia ka Sixth Schedule, u Bah John F Kharshiing, u la kren shai ba ki Hima Khasi States naduh ki snem 1947-48 ki la pyrshah ia ka Sixth Schedule.
Ka jingpyrshah ka long namar ki nongwei ki lah ban long MDC kumba paw ha ki kyndon Sixth Schedule haduh kine ki sngi, u la pynkynmaw ba ha u snem 1952 u lat u la thung saw ngut kiba shuh sieh da ki MDC nongwei kaba la wanrah ka jingiakhih kaba jur hapoh Shillong, bad nangta ha u snem 1972 ar ngut ki MDC nongwei ki la jop na Laban bad na Laitumkhah kum ki MDC, katba da ka nongrim ka IOA & AA tang ki Khasi kin ioh long dkhot kane ka dei ka jingiapher ka jingpyrshah kaba hakhmat eh.
Shuh shuh u la ong ba katkum ka IOA & AA ka jylla Khasi States ka la dei ban paw naduh ba sdang ha ka Constitution Ri India kuma ka jylla kaba kyrpang, hynrei u la ong ka sakhi jong ka jingim ki dulir IOA & AA ki pay haba ki kyntien “Khasi States: ki sah kut hapoh ka First Schedule hapoh u pud ka jylla Assam haduh kine ki sngi, bad u la kyntu jur ia ki MDC ba kin pyrkhat sani bha ia kane ka bynta ha kaba u long uba kloi ban pynshai shuh shuh halor katei ka phang.
U Bah John F Kharshiing, u la pynsngew ba kan jinglada iarap ban iada ia ka Ri lada ki kyntien Dorbar Kur, Dorbar Shnong, Dorbar Raid bad Dorbar Hima, ki paw shai kumjuh ruh kan jinglada long ka jingiada lada ki kyntien Syiem, Lyngdoh, Sirdar, Myntri, Basan, Syiem Raid, Lyngdoh Raid, Sordar Raid, Dolloi, Rangbah Shnong, Sordar Shnong, Myntri Shnong, Rangbah Kur ki paw shai hapoh ka Constitution Ri India kumba paw shai ki Gram Panchayat, District Panchayat (shnong nongwei) hapoh Constitution Ri India lyngba ka Article 243.
Hadien ka jingiatai ka jingiakren ka jingia jingmut ki MDC na baroh ki liang kaba la neh naduh 10Am baje mynstep ha kaba la ia kynduh shuwa ka Advisory Committee bad hadien la sdang ka jingialang bad ki MDC naduh 11 baje mynstep haduh 2.30pm baje mynsngi. katei ka jingialang hapoh ka jingpyniaid u Bah PN Syiem, Chairman, KHADC ka la rai ban shim ba ki dulir IOA & AA ki long kiba kordor bha ban iada ia ka jaidbynriew bad ba kitei ki dulir kin long ki mat kiba donkam bha ban iada ia ka Ri ka jaidbynriew Khasi bad Jaintia haba pynap ia ka jingthmu ka Sorkar India ban pynbeit thymmai ia ka Sixth Schedule. La shim ruh ia ka rai ban jubap ia ka shithi pan jingshai na kaSorkar Jylla halor ka IOA & AA.
Hadien katei ka jingiakren halor ka IOA & AA la bud sa ka jingiakren halor ki kyndon pynbeit thymmai halor ka Sixth Schedule kiba ka Sorkar India ka la dep ban pynkhreh bad ha katei ka jingialang la shim ia ka rai ban pynlong ka jingiakynduh kaba kham kyrkieh bad ka Sorkar Jylla ban ioh pynsngew ia ki jing donkam ban bsuh bad pynbeit shuh shuh sa katto katne tylli ki mat hapoh kitei ki jingpynbeit thymmai jong ka Sixth Schedule khamtam ha kaba iadei ki Village Council bad ki Municipal Councils hapoh u pud u sam jong ka Sixth Schedule.
Katei ka jingialang ka la rai ba la donkam ban khot lang ia baroh ki kynhun naduh ki Khlieh Nongsynshar kynthup ki kynhun treimon sngewbha ban ioh ia syllok bad ki halor kane ka phang.
