Shillong, Kyllalyngkot 10: Ka jingialang jong ka Kabinet kaba la long mynta ka sngi ha Sohra kala pdiang ia ka rai ban pynkiew noh ia ka bai trei jong kiba trei bylla, ia kiba khlem pat nang T.525/- kiba la don jingtip ia ka kam T.565/-, kiba la tbit ha ka kam T.605/- bad ia kiba la tbit bha T.654/- tyngka shisngi.
Ka kabinet kala shim ia ka rai ruh ban iathuh noh ia kito ki nonghikai Adhoc kiba la thung shuwa u snem 2007, hynrei kiba khlem rung ha ka thup jong ki 3000 ngut ki nonghikai kiba la ithuh kum ki nonghikai sorkar, ia kiba dang shah ieh mynta kito ki nonghikai yn ithuh noh kum ki nonghikai skul sorkar kane kalong katkum ka ria jong ka Supreme Court.
Ka Kabinet kala pdiang ruh ia ka jingpynkylla ia ka Meghalaya Fiscal Responsibility and Budget Management Act, 2006, katkum kla jingai jingmut ka 15th Finance Commission namar la shah ia ka sorkar jylla Meghalaya ba ka lah ban shimram tang hapoh ka 3.5 percent jong ka GSDP na ka bynta u snem mang tyngka 2024-25.
Ha ka ne ka jingialang la pynbeit ruh ia ki kyrteng jong ki myntri sorkar bad kiwei ba kin kyntiew ia ka lama jong ka Ri India ha ka sngi rakhe ia ka Republic day kaba 76 jong ka Ri India ha ka 26/1/2025.
