Shillong Iaiong 22: U kyrtong ka National People’s Party (NPP) na Sohiong Konstiwensi u bah Samlin Malngiang, u la kam na bynta ban pyntuid ia ki skhim bad pisa ha kane ka konstiwensi dei ban jied ia u kum u nongmihkhmat sha ka Iing Dorbar Thawain ka jylla.
U bah Samlin u la kam ba u dei u khun khatduh ha ka party, bad ynda phi la jied kum u MLA, ynda la poi ha Secretariat un lehroh ia ka sorkar bad ngan shu khroh beit ha kaba ka pisa bad ka skhim ngin tong na Secretariat bad kan tuid sha Weilyngkut ia kane la ong ha ka jingialang paidbah ha katei ka shnong.
U la ong ba ka party NPP kadei kaba ialam ia ka sorkar, katba kiwei pat ki la shu wan snoh ha ka Bos. Namarkata dei ban pyntikna ban pyndap ia ka Shang na ka 26 ngut sha ka 27 ngut da kaba jied ia u kum u MLA bad ban tam don burom.
La ong ba baroh shi katta la jied ia u MLA khlem pat tip mano ban thaw sorkar, hynrei mynta la tip ba lada jied ia u MLA Sohiong yn jied ia u MLA ba la don lypa ha ka sorkar bad mynta ki don kam sa tang ia u Shabi, la ong ba mynta un ap ia u shabi na ki paidbah.
La kam ba ha kine ki snem ba ladep ka party NPP ka la iakhun ia ki ishu ban thaw ia ki ain ba kyrpang ban iada na ka jingrung kyrthlep ki briew nabar da kaba pas ia ka Ain ILP bad ka la pas ia ka Ain ban pynrung ia ka ktien Khasi ha khyrnit ba Phra jong ka Riti synshar ka ri.
Ka party NPP ka la shim ruh ia ka synjam ban pynbeit ia u pud u sam hapdeng ki ar tylli ki jylla bad haba iadei bad ka ishu ban pynkynriah ia ki Them Motor ka Party ka la don ia ka jingkut jingmut,” la ong u bah Samlin ha ka jingialang paidbah ba long ha shnong Weilyngkut, Sohiong.
U kyrtong ka NPP u la ong ba ka jingleit iasoh jong u sha ka Party NPP kadei halor ka nongrim ban wanrah ia ka roi ka par ha ka pule puthi, ka iohkam iohjam bad ka umbam umdih.
Kum u Nongialam, nga la ialam kum u MDC bad u MLA, nga la don ka jingtip bad ka jingshem phang kumno ban ialam ia u paidbah khnang ba un ioh ka jingmyntoi ban iohi ia ka roi ka par ha kane ka konstiwensi, la bynrap bun mynta ki mih ki jingkynnoh bad ki jingkynthoh namar ba bun ki tieng ia ka NPP namar ba ka dang kiew Arshah.
U bah Samlin u la `ong ruh ba la don ka jingiakren bad u Symbud Myntri Rangbah ka jylla u bah Prestone Tynsong, ban iathaw lad ban wanrah ia kawei ka jingangnud jong ki 24 ngut ki Rangbah shnong ban wanrah ia ka bank Kynshew pisa (Bank) ha ka shnong Weilyngkut.
U bah Samlin u la kular ba ha kane ka kynti mynta un trei arshah ban ha kine ki san snem ba ladep. La kam ruh ba ki paidbah ka Sohiong mynta kin ai ka jingkyrshan ba Pura ia ka party NPP. Ka ilekshon ha Sohiong kan long ha ka 10 tarik u Jymmang bad ka jingniew ia ka Vote kan long ha ka 13 tarik Jymmang.
