Shillong, Risaw 11: Ka lympung ‘Meghalaya Youth League 2024’ ka la jam sha kaba kut ha ka sngi Thohdieng ha kaba ka burom lahduh ka la leit sha ka West Jaintia District Sports Association ha ka kyrdan lehkai U-14 bad ka Shillong Sports Association ha ka U-16 hadien ka jingïakhun ïa ka final kaba la long ha SSA Stadium – First Ground, Polo.
Ka West Jaintia DSA ka la lah ban pynliem noh ïa ka Nongstoin District Sports Association da 2-0 kol ha ka jingïakhun kaba nyngkong ha kane ka sngi, bad hadien nangta ka Shillong SA ka la pynliem ïa ka Ri-Bhoi District Sports Association da 2-1 kol ban rah ïa ka namlahduh.
Kane ka lympung ïalehkai kaba thmu ban kyntiew ïa ka phutbol hapdeng ki khynnah ba dang ha ki khad snem ka rta la pynlong da ka Meghalaya Football Association bad ka la ïoh jingkyrshan baroh shilynter naduh ba sdang na ka Sorkar Jylla Meghalaya.
Ha kane ka sngi la wan sakhilang ïa ka final da u Myntri ka tnat Sports jong ka Sorkar Jylla- u Bah Shakliar Warjri bad kiwei ki riew pawkhmat ba kynthup ïa u MDC ka Mawsynram- Bah Alvin K Sawkmie, Working President ka Meghalaya State Olympic Association – u Bah John F Kharshiing.
La wan Kongsan ha ka final jong ka U-14 da i Deputy Commissioner jong ka East Khasi Hills, ka Kong RM Kurbah IAS. Kiwei pat kiba la don ryngkat ha kane ka sngi ki kynthup ïa ki dkhit ba rangbah jong ka MFA, ba la ïalam da u President Bah Hamletson Dohling bad General Secretary – Bah Sunesh Syiem.
Haba phai sha ka jingïakhun, hadien ba ym shym la don ba lah pynkhihjar ha ka kylla step, u Shanmiki Myrchiang u la lah ban khyrwit ïa ka kol ba nyngkong na bynta ka WJDSA tang khyndiat minit ba la sdang ka kylla miet, hadien nangta u Elvinson Lyngdoh u la pynskhem ïa ka kynhun da kaba pynkhih sa ïa ka kol kaba ar. Watla ka NDSA ka la durut tyngeh ban pynphai hynrei kam shym la lah satia ban thep kol haduh kaba kut jong ka por.
Haba phai sha ka kyrdan Under-16, ka kylla step la i kumba kan kut da ka jingïakhaid hynrei shuwa ban kut artad ka kylla ba nyngkong ka SSA ka la ïoh ïa ka kabu ksiar na ka penalty. ïa kane la shimti da u Menangpyndap Khongjee, u ba khlem pynsepei bad buh hakhmat ïa ka kynhun da 1 kol.
Ka RBDSA ka la jubab da kaba pynïakhaid tang mar ïa bteng ka kylla miet, kane ka kol ka la wan lyngba u Wanplielad Marbaniang hadien ba u rangapkol ka SSA u khlem shym la lah ban bat skhem ïa ka bol.
Hynrei ka SSA ka la ïoh biang ban lamkhmat ïa ka jingïalehkai lyngba ka kol na u Iminstar Mawlong. Ka Ri-Bhoi ka la pyrshang katba lah ban pynjlan ïa kane ka jingïakhun haduh ka extra time hynrei bun ki kabu ki la long lehnohei naba kam shym la lah satia ban pynurlong ïa ki.
Baroh ar tylli ki kynhun (U-14 bad 16) kiba la rah namlahduh ki la ïohpdiang ïa ka song khusnam kaba haduh 2 lak, katba ki kynhun ba wan kyrdan ba ar ki la ïoh ïa ka song khusnam kaba 1 lak.
Haba ai jingkren ha kane ka sngi, u Bah Shakliar u la ai khublei ïa baroh ki spah ngut ki khynnah lehkai na kylleng ka jylla kiba la ïashimbynta ha kane ka lympung MYL.
“Ka Meghalaya Youth League ka ïahap bad ka jingthmu jong ka Sorkar Jylla ban kyntiew ïa ki khynnah ïalehkai jong ngi bad kine ki jingpyrshang kin sa seisoh na ka bynta ka jylla jong ngi ha ki por ban wan,” la ong u Bah Shakliar.
U Bah Shakliar u la pyntip ruh sha ki paidbah ba ïa ka MFA Turf kaba don ha Third Ground yn sa ïoh ban siang thymmai noh ïa u phlang plastik (Artificial Turf) ha kine ki bnai ban wan.
“Ngi tip ba ka phutbol ka dei ka jingïalehkai ba ka jylla ka ieid bad sngewtynnat tam bad ka Sorkar Jylla ka la rai ban kyrshan ban siang thymmai ïa u artificial turf ha MFA Ground,” u la pynbna.
ïa ka MYL la plie paidbah ha u Naitung da u Myntri Rangbah ka jylla Meghalaya, u Conrad K Sangma. Ha katei ka por u la pynpaw ba kane ka lympung kan “wanrah jingkylla” bad kan don ka “jingktah kaba khraw” ha kaba ïadei bad ka jingïalehkai phutbol ha Meghalaya bad ruh shabar.
Ki la don haduh 18 tylli ki synjuk ïalehkai na ki district bapher bapher kiba la ïashimbynta ha ka U-14 bad 19 tylli ha ka U-16. La pyndep baroh haduh 160 tylli ki jingïalehkai, bad la sakhi haduh 620 tylli ki kol. Ki khynnah ki la lah ban pyni ïa ka jingtbit jong ki la ka long ha ka liang ki bak, ban ïada kol bad ka jingïalehkai kaba hok hapdeng ki khynnah.
Nalor ki khusnam lahduh la ïoh ruh ban sam khusnam na bynta ki rangïalehkai ba kynsai. Ha ka U-14 ïa ka khusnam ‘Player of the Final’ la khur da u Shanmiki Myrchiang jong ka WJDSA bad u la khur ruh ïa ka khusnam ‘Player of the Tournament’. U paralok ba ïalehkai ryngkat, u Kaisarmi Dkhar u la ïoh ïa ka nam Top Scorer, katba u Edyson Marbaniang jong ka SSA u la khur ïa ka nam Best Goalkeeper.
Ha ka U-16, lai ngut ki khynnah lehkai ka SSA ki la khur khunsma, kine ki kynthup ïa ka nam ‘Player of the Final’ ba la khur da u Iminstar Mawlong, nangta u Iaiapkyrmen Kharkongor ïa ka Best Goalkeeper bad u Menangpyndap Khongjee ïa ka nam Player of the Tournament. U Me-u-ba-ai Sumer jong ka Ri-Bhoi u la ïoh ïa ka nam Top Scorer.
