Shillong, Lber 14: Mynta ka sngi ka “Riti Academy of Visual Arts” kala rakhe ia ka jingdap lai snem naduh bala seng ia ka ha u snem 1991 bad ha kane ka sngi ka Academy kala pynkup burom ia u samla Denis Marbaniang u ba barikor ba kynsai na pdeng kiwei, ia kane ka jingpynkup burom la ai da u Commissioner bad Secretary ka tnad pynneh pynsah riti u bah Fredrick R Kharkongor.
Haba kren ha kane ka jingrakhe ia ka lyngkhuh snem kaba la 30 u bah Kharkongor u la ai khublei kyrpang ia u bah Raphael Warjri nongseng ia ka Riti Academy u la shah pynkup burom da ka Meghalaya Day Award ha kaba ia dei bad ka jingkyntiew ha ka kam dro kam thoh ha ka jylla.
U bah Kharkongor u la ong ba kumba ka long kane ka jinghikai ban dro dur ka dei ka kam kaba dang ialeh ban kiew ha kane ka jylla bad u bah Raphael u la long u wei u ba ialeh ban pynkiew ia kane ka kam, la ong ba kane ka kam kaba u bah Raphael u leh dang dei ban ioh ia ka jingkyrshan, ym kum ka rwai ka siaw kaba la kiew bha ha kane ka jylla.
Ha kane ka sngi ruh la sam ia ki syrnot sha ki nongjop jong ka jingiakop dro dur ha ka jingdap 150 snem u kpa ka jiadbynriew kaba la pynlong online ha snem 2020, na mar ka COVID-19 ym shym la lah ban pynlong ia ka jingiakop dro kumba dei ban long.
Kiwei kiba la kren ha kane ka sngi ki long ka Sonal Mishar ka Inspector General jong ki pulit CrPF, u Professor Suba, ha kane ka sngi la ia don lang ruh kiwei ki barokor jong ka jylla ban ia sakhi lang ia kane ka sngi, ia ka jingrakhe ha pynlong ha jaka trei kam ha Jaiaw Langsning.
