Shillong, Iaiong 05: Ka KSU lyngba ka KSU East Jaintia Hills District Unit ka la ioh ban rakhe iaka Sngi Kyrsiew Ri lane ka Khasi National Awakening Day mynta ka 4 tarik u Iaiong ha District headquarters ha Khliehriat ha khmat u mot sahnam u Woh Kiang Nangbah ba don ha katei ka jaka.
Ha kane ka sngi la ia don lang ki para sengbhalang naduh ka FKJGP ka HNYF bad ka AJYWO bad ki seng nongniah kali kamai ha kaba ki la iashim bynta ban rakhe lang iakane ka sngi. Ha kane ka sngi ka seng ryngkat bad ki paralok sengbhalang kiba la wan la ioh ban thang iaki kyndon jong ka Citizenship Ammendment Act 2019.
Ha kane ka sngi kum shi bynta ban pynpaw ka jingpyrshah ba jur halor ka jingthmu ka sorkar ban wanrah iaka lynti rel sha ka thain East Jaintia ka seng ka la sam ruh iaki kot lyngkdop ba la pynkhreh daka lad pathai ka seng sha ki paidbah ha khliehriat ki ban pynsngewthuh iaki paidbah kumno kan ktah iaka thain bad ka jylla hi baroh kawei.
Kum ban shu pynkynmaw ba ka seng ha u bnai ba lah dep ka la sam ruh iakine ki kot lyngkdop sha ki shnong ba pher bapher khatam ki thain Elaka Sumer ter ter ha kaba ka don ka jingsuba ba ka lynti rel kan poi na kine ki thaiñ.
Ka seng ka iengskhem halor ka nongrim ban nym pdiang da leilei ruh bad ki nongmihkhmat kiba thmu ban wanrah iaka rel sha jylla kin hap ban pyrkhat sani bad peit shwa iakaei ba dang duna ha ka dong thaiñ hynrein ym ban shu long niangkohnguh
