Shillong, Jymmang 13: U Symbut Myntri Rangbah ka jylla u bah Prestone Tynsong mynta ka sngi u la pyntip ba naduh kane ka taiew ban wan lah ban pynmih ia ka Oxygen ha Shillong Civil Hospital na ki hynriew tylli ki kor pynmih Oxygen.
La kyntu ia ki paidbah ba kim dei ban don kano kano ka jingsyier ha kaba ia dei bad ka Oxygen namar kumba ka long haduh mynta ka jylla ka biang ia ka jingdon ki tyndong Oxygen.
La ong ba ynda la sdang ka jingpynmih Oxygen ha Shillong Civil Hospital, ia ki tyndong kiba bun na Civil Hospital Shillong yn lah ban sam sha kiwei kiwei ki bynta jong ka jylla, la ong u bah Prestone.
Haba ia dei bad ki kor ban pynmih Oxygen, ha Tura, Jowai bad Nongpoh kine ki kor kila don ha lynti mynta bad mar ia poi kin sdang ban pyndait noh ia ki bad la antad ba ha ka taiew ba nyngkong jong u bnai Jylliew yn lah ban sdang noh ia ka jingpynmih Oxygen ha kitei ki District.
