Shillong, Nohprah 15: U nongai ktien ka party Congress u Zenith Sangma MLA u la buh ka jingkylli halor kano ka nongrim ba ka Garo Hills Autonomous District Council kala ai jingbit ia u Sanjay A Sangma ban khrong pisa na ki trok dewiong ha North Garo Hills ha ka surok bah NH-61.
Haba kren ha ki lat pathai khubor mynta ka sngi u Zeinth u la kynnoh ba ia u Sanjay A Sangma la ai jingbit da ka GHADC ban khrong pisa na ki trok ha katei ka surok bah bad la kam ba ka jingkhrong ha kaba sdang ka long T.500/- tyngka hynrei mynta ka sngi la kynnoh ba la khrong T.1000/- tyngka na kawei ka trok dewiong.
“Nga buh ka jingkylli ha khmat ka GHADC halor kane ka rule na ka ain ba ka lah ban ai bor ban khrong pisa na ka trok dewiong ha katei ka surok bah, namar ki kot ki sla kiba nga don la ai da ka GHADC” la ong u Zenith.
Hlaor kane ka jingkhrong pisa ki paidbah kila leit ban ujor sha ka ophis jong u Deputy Commissioner bad u Deputy Commissioner la phah sha u Superintendent ki pulit bad ha ka jaka ba ki pulit kin leh ia kaba don kam, mynta ka khrong ha ka jingiada ki pulit, la kynnoh biang u tei u nongialam ka seng Congress.
Haba ia dei bad ka jinglum ia ka khajna na ki moar poh khyndew la leh ka sorkar bad ia ka bhah ba dei jong ki District la ai na ka sorkar wat ha pdeng kine ki jingleh ki nongtrei jong ka GHADC, u la buh ka jingkylli ba kumno ki nongtrei kim ioh ia ka tulop jong ki mynta la 30 bnai bad kane ka juh ia ki jingeh ia ki bad kumno kine ki nongtrei ka GHADC im khlem ioh tulop.
Kane ka jingeh jong ki nongtrei kam dei tang ha GHADC, ki nongtrei jong ka MeECL, MCCL bad ki nonghikai SSA ruh ki khlem ioh tulop mynta la bun bun bnai bad kane ka dei ka por leh kmen khrsitmas katno kan ktah ia ki.
