Shillong, Kyllalyngkot 26: Ki ar tylli ki seng, ka CSWO bad ka TUR ki seng kiba ia leh pyrshah ia kine ki kam jrong kti jrongkjat ia ki kynthei, mynta ka sngi kila pynlong ia ka “Signature Campaign” ban pyrshah ia kaei kaba la mih ha ki lad pathai khubor kaba la kynnoh ba u Lat jong ka jylla u V Shanmuganathan u la pyrshang ban jrong kti ia kawei na ki khynnah ban leit wad kam.
Kine ki ar tylli ki seng mynta ka sngi kila pynlong ia ka jingpyrshah ia kane ka jingjia kumba la paw ha ki lad pathai khubor bad ia ki jingsoi jong ki paidbah kin phah sha u president jong ka Ri India ban pyrshah ia kane ka jingleh jong u Lat kumba la kynnoh.
Ban ia shai halor kane ka jingkynnoh ia kane ka kam jrong kti jong u Lat ka jylla ka TUR ka dawa ba dei ban don ka kynhun tohkit kaba laitluid ban lap ia ki jingshisha baroh.
