Shillong, Lber 02: U bah Teiborlang Pathaw haba jubab ia ka jingkylli kaba la wanrah da u bah R V Lyngdoh, ha kaba ia dei bad ka jingpynlut ka KHADC ha ka jingtei kiba ka ophis kala pynlut, na ka liang jong u EM u la iathuh hapoh ka iing dorbar ba ha kine ki saw snem la pynlut haduh T.80.03 klur tyngka.
La iathuh ba kine ki jingtei ki dei kiba dei jong ka KHADC bad ki don ruh kiba ka KHADC ka pyntei bad aiti pat sha ki hima bad ki shnong, dei ha u snem mang tyngka 2018-2019 bad 2019-2020 ka KHADC kala shim beit tang ia ki jingtei kiba dei jong ka KHADC.
Haba jubab ia ka jingkylli u bah Balajied Ranee u bah Pathaw u la ong ba ki jingtei baroh ki long 75 tylli baroh na ka jingpynlut ia katei ka pisa, na kine 63 tylli ki jingtei la lah ban pyndep bad kiba dang sah mynta ki long 12 tylli.
Ha kane ka sngi kut jong ka dorbar mang tyngka kaba lai sngi, ka iing dorbar kala pdiang ruh ia ka mang tyngka jong u snem 2021-2022, ka la pdiang ruh ia ka KHAD (Administration of Elaka) Bill, 2021, ka KHADC( Nomination and Election of the Syiem, Deputy Syiem and Electors of Nongstoin Syiemship) Bill, 2021, ka KHAD (Establishment, Management and Control of Market) Regulation Bill, 2021.
Ka iing dorbar ka la pdiang ia kitei ki bill baroh khlem da don kano kano ka jingiakren hapoh ka iing dorbar.
