Shillong, K.Lyngkot 20: Ka jingrakhe ia ka jingdap 50 snem ka jylla Meghalaya ka “Golden Jubilee” kan long la shai ka sngi ha Jawaharlal Nehru Stadium bad ia kane ka jingrakhe yn pyni paidbah lyngba ka TV Northeast Live, Doordarshan DD Meghalaya, lyngba ka Facebook @DIPR Meghalaya bad ha ki TV Chanel.
Ha kane ka jingrakhe wat la ka sorkar kam shym la pynbna paidbah hynrei la sngewthuh ba ki ban poi sha katei ka jingrakhe la khot sngewbha ba kan nym duna ia ka shihajar ngut naduh ki heh sorkar haduh ki nongialeh Hills State kiba lah ban poi sha kane ka jingrakhe ban long la shai ka sngi.
Ha kane ka jingrakhe ia ka jingdap 50 snem, la khot sngewbha ia ki rangbah shnong, ki nongialam seng bhalang, ki nongialam seng sain pyrthei, ki nongialeh Hills State bad don katto katne ngut ki briew kiba don bynta ha ka jingialeh Hills State.
Na ka daw jong ka kne ka COVID-19 namar ba ym lah ban pynlong ia ka jingrakhe paidbah, na ka liang jong ka sorkar kala pynkhreh ban pyni paidbah ia kane ka jingrakhe lyngba ki TV, ki Focebook na ka page jong ka @DIPR bad ha ki TV Chanel jong ka ka jylla.
Ka jingrakhe ka ban long ha JN Stadium ha Polo ka dei ka jingrakhe kaba la pynkhreh da ka sorkar jylla, la shai ka sngi kan don ruh ia ka jingrakhe ha Meghalaya Legislative Assambly, ha Congress Bhavan, ia kane ka jingrakhe yn long ha kiwei kiwei ki bynta ruh ia kaba la pynkhreh da ki dong bad ki shnong.
