Shillong, Jylliew 25: Ka jylla Meghalaya ryngkat bad ka pyrthei baroh kawei mynta ka sngi kala rakhe ia k jingialeh pyrshah ia ki kam dih drok bad ki kam khaii kynthei ha kane ka nongbah Shillong ha Soso Tham Auditorium.
U Director General ki Pulit jong ka jylla Meghalaya u Dr. L R Bishnoi la ong ba ki nongdih drokha India ki don 7.3 klur ngut bad na kine 1.2 klur ngut ki dei ki khynnoh kiba hapdeng 11 bad 18 snem bad na kine 55 lak ngut dei ki kynthei.
Ha Meghalaya kiba dih drok ki don kumba 2.5 lak ngut kynthup ia kiba shu injek kane ka dei ka rukom long ka jingdih drok ha kane ka jylla Meghalaya, ka jylla Meghalaya ka jan bha sha ka laidong bad ka jylla ka dei ka jaka iaid lynti jong u drok bad kane pynlong ia ki pulit ba hap ban pyrkhing.
Ha kane ka jingrakhe ia kane ka sngi pyrshah ia ka kam dih drok bad khaii kynthei u DGP la batai bniah ba kumno ki nongkhaii beain ki leh ban pyniaid ia ki kam beain bad na ka liang jong ki pulit kila wanrah ia ka rukom trei kam kaba thymmai ban ia khun pyrshah ia ka kam khaii drok.
Na ka liang jong ki pulit kila pynkhlain ia ki jingkhynra ia ki kam khai drok bad kila pynlong ruh ia ki jinghikai ha ki shnong bapher bapher, ha ki skul bad ki Kolej bad kiwei kiwei ki kam ban iada kane ka jingsniew. La iathuh ha kine ki 15 sngi bala dep la pynlogn ia ki jinghikai ban ia khun pyrshah ia ki kam drok bad la ioh ban ia kynduh palat 15061 ngut ki briew ban pynsngew thuh ia ki.
