Shillong, Iaiong 17: U Chief Electoral Officer ka Jylla u Dr. BDR Tiwari u la pyntip ba ki don 50 tylli ki jaka thep vote ha ka ba ki nongtrei ka tnad election ki don kam ban iaid ia ki riat bad ki jaka ba ki hap ban ja sha shiliang da ki lieng.
U CEO u la pyntip ruh ba ka jinglong jinman jong ki sawdong sawkun hapoh ka Jylla Meghalaya ki don bun ki shnong hapoh ka Jylla ki ba don sha ki riat ne sha shiliang wah, ha kaba ki ophisar kiba dei pyniaid ia ka election ki leit ban pyndep ia kam jong ki.
U CEO u la pyni nuksa da ka wei na ki shnong kum ka Nongriat ka ba hapoh ka East Khasi Hills ka ba pawnam na ka jingdon jong ka jingkieng dieng Jri, u la ia thuh ba ki nongtrei ka tnad Election ki hap ban noh ia ki riat ba kin lah ban poi sha kane ka shnong ba ki paidbah kin ioh ia ka lad ba kin ioh ban thep ia ka vote jong ki.
U la ong ruh ba ka kat kum ka jinglong jingman ka suin bneng ha poh ka Jylla ha kaba ka la pyni ba kan don ka jinghap slap ha kine ki sngi ban sa wan hynrei na ka liang ki bor pyniaid ki la dep ban pynbeit ia ki jingdon kam.
