Shillong, Jymmang 18:U Myntri Khynnah jong ka Sorkar Pdeng ba dei khmih ia ki tnat Chemicals bad Fertilizers and New bad Renewable Energy, u Bhagwanth Khuba mynta ka sngi u la leit sha Nongstoin, West Khasi Hills District ha Meghalaya bad u la peit ia ka jingpyntreikam jong ki skhim Sorkar Pdeng ha ka jylla.
U Myntri u la peit ia ka jingpyntreikam ia ki skhim bad u la iakynduh ia ki nongmihkhmat jong baroh ki tnat bad ki bor distrik. “Mynta ka sngi nga la peit ia ka jingpyntreikam jong ki skhim jong baroh ki tnat Sorkar bad ka bor distrik,”.
Ha kane ka jingiakynduh u la ong da kaba bynrap ba u la hunia ka jingpyntreikam jong ki skhim bapher bapher. U la ong ruh ki don katto katne ki jingkhuslai bad ba la dep iakren ban pynbeitia ki jingeh.
U la kren shaphang ki skhim solar PM KUSUM, bad u la iathuh ba ki don shuh shuh ki subsidy na ka bynta ki jylla ka thain shateilammihngi. “Ka skhim KUSUM rooftop ka dei kaba don ha baroh kawei ka ri. Ngi la ai subsidy shuh shuh ha kine ki jylla ka thain shateilammihngi.
Baroh ki skhim kiba iadei bad ka thain shateilammihngi ki dei kiba ngi peit thuhbha, ki don shuh shuh ki subsidy ki ban ai jingmyntoi ia ki briew. Nga kyntu ia ki bor distrik ba kin shim shuh shuh ia ki jingmyntoi na ki skhim MNRE,” u la ong ha ka jingai jingkren jong u ha Nongstoin.
U Myntri u la pynlong ruh ia ka jingialang bad ki briew bad ki rangbah shnong na Nongstoin kiba la batai ia u shaphang ki jingeh bapher bapher. U Khuba u la ong ba yn shim lutia ki sienjam ban pynbeit ia kine ki jingeh.
Ha ka jingiakren bad ki lad pathai khubor, u Myntri u la ban biang shaphang ka jingpeit bniah bad ka Sorkar Pdeng ban kyntiew ia ka thain shateilammihngi ha ki kam bapher bapher – ka jingkyntiew ia ki jingdon jingem kum ki surok bah, ka jingpynpoi surok sha ki shnong.
Ka jingpynioh ia ka um kaba khuid lyngba ki kor bad kiwei kiwei. “Mynta hadien 9 snem, ka thain shateilammihngi ka la iaryngkat kyrdan bad kiwei kiwei ki jylla jong ka ri.”
U Myntri u la ong ba ka Sorkar ka la pynthikna ba ki Myntri Sorkar Pdeng ki wan jngohia ki jylla ka thain shateilammihngi man ka ar taiew ban pynthikna ia ka jingpyntreikam kham sted jong ki prokram ka Sorkar Pdeng.
Hadien ka jingialang, u Myntri u la leit ruh sha Mawkawah Anganwadi Centre, Sibsingh Memorial Govt School Nongpyndeng bad Mawlieh Sub-centre mynta ka sngi.
U la iakren bad kito kiba ioh jingmyntoi na ki skhim Sorkar Pdeng, kiba kynthup ruh ia ka PM AWAS Yojanabad u la shem ba ka la don ka jingpyntreikam bha ia ki skhim. U la kyntu ia ki bor distrik ba kin pynthikna ba baroh kiba dei ban ioh jingmyntoi ki ioh ia kane.
