Shillong, Nohprah 25: Ka shnat jong ka Ramakrishna Mission, Shillong kala shim haduh 165 ngut ki khynnah na kine ki lum khasi kiba wan na ki long iing kiba duk na kiba duk tam eh kiba dei na Ri Bhoi District na ka Umden Arka, na East Khasi Hills na ka shnong Lyngiong Umkaber na kane ka nongbah Shillong na Goraline bad ha kane ka shi snem lynter kila pynlut ha duh T. 16,80,000 na ka bynta jong ki.
Ka jingkyrshan kaba ka Ramkrishna Mission kala leh na ka bynta jong ki ka long ba kala ai ia ki Uniphom skul, ki muja , ki juti bad kiwei ki jain phong , ym tang ba kala ai ia kine ki jingiarap hynrei ka ai bam ruh ia ki ryngkat ka jingsam ia ki dawai dashin, ha ryngkat ka jinghikai ia ka akor ka burom ha ka long briew man briew bad ka jinghikai computer ruh kum juh.
Ha kaba ia dei bad ka jingai jinghikai ha ka liang jong ki kor computer ha kane ka nongbah Shillong kala ai ka jinghikai haduh 5460 ngut ki samla ha ka jaka ai jinghikai jong ki kaba don ha Quinton Road. Ha kaba ia dei bad ka jingai jingsumar lyngba ki dispensary jong ka kila sumar haduh 37,077 ngut ki briew bad ki la pynlut haduh T.1,16,18774.
Haba shim kyllum ia baroh ki jingpynlut ba ka Ramkrishna Mission kala leh kala pynlut haduh T.36.76 core bad ki briew baroh kiba la ioh ia ka jingmyntoi ki long haduh 7.28 lak ngut ki briew bad ki long iing baroh ki long 2.21 lak. Kila pynlut ruh haduh T.16.85 klur na ka bhah ai jingiarap ia kiba duk ha dur jong ka bai bam ia kiba dang leit pule. Kane ka kynthup ia kaba iarap ia kiba duk ba rangli bad ia kiba pang ba shitom baroh kiba la ioh jingmyntoi ki long 22.70 lak ngut.
Ha kaba ia dei bad ka jingai jingsumar kiba la wan ban shah sumar ha ki 10 tylli ki hospital jong ki, 77 tylli ki dispensary bad 42 tylli ki mobile dispensary bad 910 sien kila pynlong ia ki jingai jingsumar ei bad baroh ki briew kiba la ioh jingmyntoi ki long 61.42 lak ngut bad ha kane ka bynta kila pynlut haduh T.191.48 klur .
Kum ka Mission kala pynlut haduh T.284.96 klur haka liang ka pule puthi ha kaba ki samla pule baroh ki long 3.12 lak ngut bad kila pynlut pat T.58.66 klur na ka bynta ki kam pynroi ia ki riewlum kiba la ioh jingmyntoi baroh ki long 86.51 lak ngut ki riew lum sha ki nongkyndong. Halor kine ki jingtrei ka Ramakrishna Mission kala ioh ia ka khusnam Banga Bibhushan Award,2015 na ka sorkar jong ka West Bengal, ka ong u Swami Achyuteshananda Secretary ka Ramakrishna Mission.
