Shillong, Iaiong 17: U shongknor jong ka ISRO ka Ri India u Somanath S mynta ka sngi la ong ba la iohi ba ki don kumba 5000 tylli ki met bneng kum kane ka pyrthei, hynrei haduh mynta ki briew ki dang lah ban iuhkjat tang ha u bnai.
Haba kren ha ki lat pathai khubor mynta ka sngi ha dien ka jingialang ha ka sngi kaba nyngkong jong ka G20 ha kane ka nongbah Shillong, la ong ba ki met bneng kum kane ka pyrthei ki don kumba 5000 tylli, katba u briew u dang lah ban iuhkjat tang ha u Bnai.
Ki briew mynta ki dang pyrshang ban hiar ha u Mars bad mynta ki dang pyrshah ban phah sha u Plato, ban leit sha kiwei ki met bneng da ki kor ki bor jong kane ka juk kaba mynta yn nym lah ban leit hap ban wat ia ki lat ki lynti ban ioh ia ki kor ki bor kiba thymmai.
Haba phai sha ka Ri India, ha kaba ia dei bad ka jingwat bniah ia ka haw haw ka sorkar kala mang ka pisa kaba biang ba kan nym don jingeh ia ka ISRO bad mynta ka sorkar India kala plie lat ruh ia ki kompeni shimet ha kane ka bynta ban wat bniah ha ka haw haw.
Ha jubab ia ki jingkylli kaba ka jylla Meghalaya ka ioh na ka jingdon ka North Eastern Space Application ha Umiam, na ka liang u shongknor ka ISRO la bthah ia u P Shakil Ahammad Principal Secretary ka sorkar Meghalaya ha kaba la ong ba ka sorkar Meghalaya kala ioh haduh 19 tylli ki skhim na ka NEC ban pyniaid lyngba katei ka jaka.
Kawei kita ka long ba lyngba ka jingiarap katei ka jaka khmih bniah ia ka suin bneng mynta ha Garo Hills la lah ban rep khaw ar sien ha ka shisnem, ka jingpynkhreh ban pynlait ia ka jingkhapngiah kali ha Shillong bad kiwei kiwei ki skhim kiba la pyniaid sha khmat.
