Shillong, Jymmang
05: Mynta ka sngi ka la don ka jingiamir jingmut hapdeng ki trai jaka, ki dkhot jong ka Coordination Committee on International Border (CCIB) ki nongialam jong ka KSU, HNYF, ki sirdar bad ki rangbah shnong ryngkat bad u CEM jong ka KHADC u Bah PN Syiem ban ia kren halor ka jingker ksianar shniah ha kahppud jong ka Bangladesh na Nongjri sha wah Umngot.
U Bah PN Syiem CEM jong ka KHADC haba kren ha ki nongthoh khubor ha dien ka jingialang kaba la long mynta ka sngi, u la ong ba ki la shim ia ka rai ban ailad ia ki trai jaka kiba khlem hap hapoh jong ka 11 meter jong ka jingshim jaka ka sorkar ba kin phah da ka jingthoh sha KHADC lyngba jong ki Sirdar shnong aiu ki don ban ong halor jong kane ka jingker ksainar shiah.
Ka jingshim ia kane ka rai ka long ba ki don ki trai jaka kiba don ki jaka rep kiba rit kiba long hapoh jong ka 150 kam na ka jingker ksainar shiah ha kaba kine kim ioh ia ka jingsiew na ka sorkar, namar ka sorkar kan siew tang ia ka 11 meter kaba ka shim ia kiba lait na kata ka sorkar kam siew bai lutksan. Hynrei ka jingshisha ka long ba kine ki trai khyndew kin duh lut ia ka jaka rep kaba rit ka jong ki.
Katkum ka jong kam jong ka sorkar pdeng ka long ba kan buh ia ki khyrdop ha man ki 500 meter ban ailad ia ki nongrep ban ia rung ia mih hynrei kane ka long tang ha ka jingpyrkhat kam long kaba shisha. Shisien ba la long sha bar jong ka jingker ksainar shniah ka jaka kala duh bad ki BSF ruh kin nym shah ban rung ia ki paidbah bad ki trai jaka kin nym lah shuh ban rep.
Ha dien ba ka KHADC kala ioh ia ka jingthoh na ki trai jaka kan sa khot ia ka Executive Committee ban shim ia ka rai ban thoh sha ka sorkar jylla lane lada don kam ban thoh ruh sha ka sorkar pdeng. Haba ia dei bad ka jingker ksainar shiah kumba ka long mynta ki don kiba kwah bad ki don ruh kiba pat kwah.
Haba kylli hato ka sorkar kala pan ne em ia ka NOC na ka KHADC haba ia dei bad kane ka jingker ksianar shiah na ka liang jong u CEM u la ong ba ki don ki jaka kiba la pan bad ki don kiba khlem pan. Ha ka jingsngew jong u katkum ka ain shim khyndew da ka sorkar kaba la pynkylla ha u snem 2013 ka sorkar ka dei ban pan ia ka NOC na ki KHADC.
