Hapoh shitaiew dawa ka sur ki paidbah Malwai ban weng kam ia ki pulit ba sait ia u bah Cheris

Shillong, Nailar 18: Mynta ka sngi ka kynhun ki rangbah shnong bad ki seng bhalang na ka thain Mawlai kila leit ban rah ia ka dorkhas sha u myntri rangbah ka jylla ia kaei kaba kila rai ha ka jingialang halor ka jingshah siat iap u bah Chersiterfield Thangkhiew ha iing jong u ha Kynton Massar.
Haba kren ha ki lat pathai khubor u bah Samuel Buiam, bah Marbud Dkhar bad u bah Donboklang Kharlyngdoh ha dien ka jingiakynduh bad u mytnri rangbah ka jylla kila pynpaw ba ka jingiakren bad u myntri rangbah ka jylla mynta ka sngi bun kiwei ki jingdawa kaba kila buh ki la pdiang ia ki.
Kitei ki nongialam baroh lai ngut kila pynpaw ba tang kawei kaba kim pdiang ka long ba ka sorkar ka ong ban weng ia ki pulit kan long ha dien ba la ioh ia ka kaiphot jong ka Judicial Inquiry ia kaba kum ka sur ki nong Mawlai kim pdiang ia kane ka jingtyrwa jong ka sorkar.
U bah Samuel Buiam u la ong ba lada ki pulit ki ki lah ban siat iap ia u beh Cheris hapoh lai minit, ka sorkar kam dei ban shim jingeh ban weng kam ia ki pulit kiba don kti ha kane ka kam hapoh shitaiew, lada ka sorkar kam lah ban weng kam hapoh shitaiew kin ia shong ia pyrkhat kum no ban leh.
U Bah Marbud Dkhar u la ong ba ka jingwan jong ki mynta ka sngi ka long tang ban ai ia ka dorkhas kaba kila ia rai ha ka jingialang mynnin ka sngi bad ka wei na kita ki rai ka long ba ka sorkar ka dei ban weng kam ia ki pulit siat briew. Ka jingdawa ban weng kam ka long ba kin nym lah ban pydam ia ki sabut.
Ha kane ka jingiakren kila kren shai ba lada ka sorkar kam weng kam ia ki pulit kiba don kti ha ka jingsiat briew kum ki nong Mawlai kin nym ia shim bynta ha ka “Peace Committee” kaba la thaw da ka sorkar.
U bah Donboklang Kharlyngdoh, u la ong ba ka jingdawa ban weng kam, kam dei ia baroh kiba don ha kato ka miet hynrei kan long tang ia ki ar ngut ki pulit, u Superintendent ki pulit ka East JAintia Hills bad ia u SP City ba ba shu dei peit.
Lada ka sorkar kala lah ban wanrah na Bangladesh sha Secretariat, kan eh aiu ban wanrah na Mawlai sha secretariat, la buh jingkylli u bah Donboklang, kum ki nong Mawlai kin nym ia ia shim bynta ha ka “Peace Committee” lada ka sorkar kam weng kam ia ki pulit siat briew.