Shillong, Naiwieng 30: Mynta ka sngi ki nongtrei jong ka Shillong Municipal kila ia kynduh ia u myntri kam pynroi sor u bah Sniawbhalang Dhar ban ia kren halor ka Tulop ia kaba u myntri u la kyrpad ia ki ba kin iai shah haduh ban da wan u myntri rangbah ka jylla ban ia kren ia kane ka kam ha kaba ia dei bad ka tulop jong ki.
La iathuh ba ka Meghalaya High Court kala pynksan ia ka jingujor ka jong ki nongtrei ka Shillong Municipal Board bad la ai ia ka rai ha ka 19th Lber 202o ba ka sorkar ka dei ban siew noh katkum ka 5th pay Commission, ia ka 4th pay ruh ki ioh ha dien ba ki la leit sha iing bishar.
Haba kren ha ki lat pathai khubor u bah B Marwein general secretary bad u S. Nongrum President ki nongtrei ka Shillong Municipal Board la ong ba ka sorkar kam shym la pyntrei kam ka iing bishar kala ai da ka jingthoh namar ka sorkar kala pynkhein ia ka kyndon.
La iathuh ba dei ha u bnai Jylliew mynta u snem 2021 bad la siew katkum ka 5th Pay Commission, hynrei ha u bani Risaw kala mih ka hukum ban pynsangeh ia kane ka jingsiew katkum ka 5th Pay Commission.
Halor kane ki nongtrei kim banse ban leit sha iing bishar bad ka iing bishar ka ai por 10 sngi ia ka sorkar ba kan siew, mynnin ka sngi ka don ka jingbishar bad ka sorkar ka ong ba ka pisa ka don kin siew noh, dei na kane ka iing bishar ka ong ba ka biang.
Hynrei jan miet ka ioh jingtip ba ka sorkar kan siew katkum ka 4th pay Commission dei na kane ka daw ba ki pynlong kyrkieh ia ka jingialang bad ki sa shim ia ka rai ba kin nym pdiang ia ka 4th Pay namar ka jingkwah ka long ban ioh ia ka 5th Pay Commission ia kaba kam lah ban long.
Ha kane ka jingiakynduh bad u myntri ka tnad pynroi sor bad ba dei peit ia ka Municipal la kyrpad ia ki nongtrei ba kin sangeh shuwa ia ka jingiakhih jong ki namar yn sa ia kren bad u myntri rangbah ka jylla ynda u la wan phai na ka jingleit jong u Myntri rangbah ka jylla.
