Bhubaneshwar, Kyllalyngkot 18: Ha ka jingieng skhem ban tei ia ka ri kaba thymmai bad kaba la kiewshaphrang, ka kynhun jong shiphew ngut ki nongthoh khubor na Meghalaya ki la iashim bynta ha ka prokram Viksit Bharat SankalpYatra mynta ka sngi ha Banpur kaba hap hapoh ka distrikKhordha jong ka Odisha.
Ki nongthoh khubor ki la iakren bad ki briew kiba ioh jingmyntoi na ki skhim ka Sorkar Pdeng na ka bynta ka bha ka miat bad ki la ai jingkren ruh ia kiba la wan iashim bynta ha kane ka prokram.
Ki dkhot jong kane ka kynhun ki la bataiia ki jingshem jong ki sha ki briew na ki jaka nongkyndong kiba ioh jingmyntoi bad ki la kyntu ia ki ba kin pynsaphriang ia ka khubor shaphang ki skhim bad ki prokram khnang ba kin bun kiba ioh ia ki jingmyntoi. Ki briew kiba ioh jingmyntoi na ki skhim bapher bapher ki la batai shaphang ki jingkylla ha ka jingim jong ki ha kane ka sngi.
Kane ka kynhun, kaba dang don hapdeng kane ka jingleit sha Odisha kaba saw sngi ki la pdiang ruh ia ka ‘Viksit Bharat Sankalp’ ha ryngkat ki spah ngut ki nongshong shnong bad ki la peit ia ki jingpyni Information, Education, Communication (IEC) shaphang ki skhim bad ki jingjop jong ka Sorkar Pdeng.
Ha kane ka juh ka sngi, kane ka kynhun ka la leit sha ka nanChilika, kaba dei ka nan lang um kaba heh tam ha Asia bad ki la ioh jingbatai shaphang ka jinglong jingman jong kane ka nan.
Ka kynhun ka la leit ruh sha ki krem ha Udaygiri bad Khandagiri, kiba la don naduh ki spah snem ba 2 BC bad hangne ki la iohi ia ka nongrim bad ka jinghiar pateng ka deiriti jong ka Odisha.
Kine ki ar tylli ki lum kiba hap hapoh ka jingpeit jong ka Archaeological Survey of India, bad hangne lah ban iohi ia ki rukom ot maw ba hyndai ha kine ki krem ban shna ia ki jaka sah jong ki briew Jaina kiba jied ban sah marwei.
Ia kane ka jingleit jong ki nongthoh khubor la pynbeit da ka Press Information Bureau, Shillong ha ka jingiatreilang bad ka Press Information Bureau, Bhubaneswar hapoh ka jingpeit jong ka tnat Information & Broadcasting, Sorkar India da ka jingthmu ban ai jingtip shuh shuh shaphang ki skhim, ki projek bad ki sienjam ba kyrpang jong ka Sorkar Pdeng.
