Shillong, Naiwieng 24: U Myntri Khynnah ba dei khmih ia ka tnat Micro, Small and Medium Enterprises, u BhanuPratap Singh Verma u la iashim bynta ha ka Viksit Bharat SankalpYatra kaba la long ha ka shnong Tynring kaba hap hapoh ka Mawryngkneng Block jong ka East Khasi Hills District, Meghalaya mynta ka sngi.
Ha ka jingai jingkren jong u, u Myntri u la ong ba ka Viksit Bharat SankalpYatra, ka dei ka campaign ha kylleng ka ri ban ai jingtip khnang ban pyntreikam pura ia ki skhim ka Sorkar India ha baroh ki jaka rilum, ki jaka nongkyndong bad ki jaka sor.
U la kren shaphag ka thong jong ka Yatra kaba long ban ai jingtip ia ki bynta ka imlang ashlang kiba shem jingeh kiba dei ban ioh bynta ha ki skhim bapher bapherhynrei ki bym pat ioh jingmyntoi na kine ki skhim.
Ka Sorkar Pdeng ka la shim shibun ki sienjam na ka bynta ka roi ka par jong ki riewlum bad ka imlang sahlang ha ki jaka nongkyndong ha kine ki khyndai snem ba la dep bad ka la wanrah ia ka roi ka par sha kine ki jaka.
U Myntri Rangbah Duh, u Narendra Modi u niewkorbha ia ka roi ka par kaba pura ha ka thain shateilammihngi jong ka ri bad u la pynthikna ba ki briew na kane ka thain ki ioh kham bun ki jingmyntoi na baroh ki skhim Sorkar.
Ki jylla ka thain ki la ioh mad ia ka roi ka par kaba stet ha kine ki khyndai snem ba la dep haba ka Sorkar ka la peit bniah ia ka jingkyntiew ia ki lad ka leit ka wan bad ki jingdon jingem.
Ka jingstet ka roi ka par ha kane ka thain ka pyni ba ka Sorkar Pdeng ka peit bha ia ka jingkyntiew ia ki lad ka leit ka wan ha kane ka thain bad ka jingtei ia ki surok bah ha ki jaka ba jynjar ban poi ruh. Na ka Look East Policy kaba rim, mynta la pyntreikam ia ka Act East Policy.
U Myntri u la sam certificate iakhyndai ngut ki briew kiba ioh jingmyntoi na ka PradhanMantriAwasYojanaGramin. Ha ka jingkren shaphang kane ka skhim, u Myntri u la ong ba ka jingpyntreikam ia ka PMAY-G – ka skhim pynioh iing ia baroh – ka la pynurlong ia ki jingangnud jong kiba duk ba suk ba kin don ka iing lajong.
U Myntri u la kren shaphang ki jingkylla kiba la wan lyngba ki skhim jong ka Sorkar kum ka PradhanMantri Jan ArogyaYojana, PM GaribKalyan Anna Yojana, DeendayalAntyodayaYojana, PM AwasYojana (Rural), PM UjjwalaYojana, PM KisanSamanabad ka Kisan Credit Card.
Ha ka jingkren shaphang ka Tnat Micro, Small & Medium Enterprises, u Myntri u la ong ba kane ka Tnat ka trei borbah banpynkupbor ia ki MSME khnang ba kin kiewshaphrang ha ka rukom kaba iaineh bad khnang ba kin iahap bad ki jinglong jingman ha kylleng ka pyrthei.
Ki longkmie na kane ka thain ki lah ban ioh ki jingmyntoi na ki skhim jong kane ka tnat namar ka don ka subsidy kaba 33% na ka bynta ki briew na kane ka thain, la ong u Myntri.
Ha ka jingkren shaphang ka skhim ba thymmai ba la plié paidbah da u Myntri Rangbah Duh ha ka 17 tarik u Nailur, ka PradhanMantriVishwakarmaYojana (PMVY), u Myntri u la ong ba ka thong jong ka Sorkar ka dei ban kyntiew ia ka jingim jong ki nongsaindur bad ki nongshna tiar bad ai ia ki ka teknoloji ka ban pynkhlain shuh shuh ia ki ba kin lah ban don bynta ha ki iew ha kane ka juk mynta.
Kane ka skhim, kaba peit ia 18 tylli ki jait kam tynrai, kan pynkup bor ruh ia ki nongsaindur lyngba ka jingtip shaphang ki tiar katkum ka juk mynta, ka jingpyniaid iew, ka jingsngewthuh shaphang ki kam digital bad ki kam pisa bad ruh ka jingkyrshan jong ka jingioh shim ram, kiba kyntiew ia ka jinglah pynmih tiar jong ki bad kaba plié lad ban pyniaid iew ia ki mar jong ki ha ka rukom kaba kham seisoh bad kaba kham ryntih, la ong u Myntri.
Hapoh ka jingialam jong u Myntri Rangbah Duh, ka India ka la kiewshaphrang ha baroh ki kam bad mynta ka don ha ka kyrdan kaba 5 ha ka ioh ka kot ha kane ka pyrthei, la ong u Verma da kaba bynrap ba shen ka ri kan sa kylla sha ka ri kaba don ha ka kyrdan kaba lai ha ka ioh ka kot.
U Myntri u la ong ba la sdang ia ka Viksit Bharat SankalpYatra da kaba shim ia ka rukom treikam kaba pura ha ka jingiadon bynta ki tnat Sorkar India bad ki Sorkar Jylla ban pynthikna ia ka jingiashim bynta jong baroh na ka bynta ka bha ka miat jong ki briew jong ka ri bad khnang ban pynurlong ia ka thong jong ka jingioh ia ka ri kaba la kiewshaphrang.
U la kyntu ia ki nongmihkhmat, ki ophisar bad kiwei kiwei ba kin iashim bynta ha ka Viksit Bharat SankalpYatra ban ai jingtip ia ki briew bad ban pynshlur ia ki ba kin leit shim ia ki jingmyntoi ba ki dei ban ioh.
U Myntri ka tnat Animal Husbandry and Veterinary jong ka Sorkar Meghalaya, u Alexander LalooHek u la ong ba ka Sorkar Pdeng ka la wanrah shibun ki sienjam ba thymmai na ka bynta ka roi ka par jong ka Jylla bad ka ri baroh kawei.
U la kyntu ia ki briew ba kin shim ia ki jingmyntoi na ki prokram bad ki skhim jong ka Sorkar. Ka Sorkar hapoh ka jingialam jong u Myntri Rangbah Duh, u Narendra Modi ka dang ialeh katba lah ban pynthikna ba ym don kanokano ka thain jong ka ri kaba sahdien, la ong u Hek.
Ha shuwa kane baroh, u Myntri u la leitjngohia ki stall ba la pynkhreh ha kane ka jaka. La don ruh ki prokram ‘Jan Bhagidari’ bapher bapher kum ka jingiathuh ki briew shaphang ki jingshem jong ki shaphang ki skhim Sorkar Pdeng, ka jingpyntreikam pura ia ki skhim kum ka Ayushman Bharat, JalJeevan Mission, Jan DhanYojana, PM Kisan Samman NidhiYojana, ODF Plus status.
Ha kane ka sngi la pynlong ruh ia ka jingiakop kyntip competition, ka jingpyni ia ka jingpynher drone, ki health camp bad kiwei kiwei. Kane ka prokram mynta ka sngi ka la khringbha ia ki briew bad la pynlong ruh ia ka jingbamsmai’Sankalp Pledge”. Ki heh ophisar jong ka sorkar jylla ki la iashim bynta ha kane ka prokram.
