Shillong, Rymphang 29: Ka Khasi Student Union jong ka thian Laban mynta ka sngi dang step kala leit ban shna ia ka iing ha Maxwelton Estate namar ka jingai por ka seng 15 sngi ia ka sorkar ban kyndang ia kiba shnong beain ha katei ka jaka kala kut.
Mynta ka sngi ka seng KSU kala shna kawei ka iing tin ha katei ka jaka bad la plie ia kane ka iing da u General Secretary jong ka seng u samla Donal V Thabah, ha kaba kala khot ba kito ki bym don jaka sah ki Khasi kin lah ban leit sah ha katei ka jaka.
Ha dien ba ka KSU kala dep ban shna bad ban plie ia katei ka iing tin kaba tang kawei kum ka dak jong ka jingkhot ia ki para khasi ban sah ha katei ka jaka mynta ka sngi.
Tang ha pdeng khyndait por kila poi ki bor jong ka District Administration ha kane ka jaka bad ha dien ka jingiakren la khot ia ki nongialam ka seng KSU Laban da ka DC ka East Khasi Hills District ban ia kren.
U President ka KSU ka thain Laban haba kren ha ki lat pathai khubor ha dien ka jingiakren bad ka kong R M Kurbah, la ong ba kan sa thoh sha ka Shillong Municipal ban pynsangeh noh ia ka ri jingri ha katei ka jaka bad ka jingpyntuid ia ka jaboh sha wah.
Haba ia dei bad ki briew kiba sah ha katei ka jaka na ka liang jong ka DC kala iathuh kane mynta ka don ka mukotduma hapoh iing kashari, hynrei na ka liang jong ka seng kam hun ia ka jubab namar ba tang ba ki don ka mukotduma ki briew par ki dang ioh ban rung ha katei ka jaka.
Ka seng ka sngewthuh ia ka jingeh ba don ka jingiakhun mukotduma, hynrei kaei kaba ka seng ka kwah ban ong ba ka sorkar ka dei ban pynkloi namar ka jingwan buhai shnong ki bar jylla ha katei ka jaka ka dang kiew na ka por sha ka por.Kumta katba ka sorkar ka dang pynslem ka seng KSU ruh kan dang bteng ban tei ia ki iing ban pynbun da ki paid Khasi.
Kaba pynlyngoh ka long ba ka dorbar shnong kamjuh ai syrnot hynrei ka jingkylli ka long ba kumno kito kiba sah ha kane ka jaka ki ioh ia ka dur thep vote, ia kane kin sa leit ujor sha ka Election Department bad ki shim ba la don ka jingleh thoh ban ioh dur thep vote kumta kin dawa ban pyndoh ia ka dur thep vote jong ki bad haba iohi kum kine ka seng kan nym lah ban shu peitkai.
