Iathuh u VP ka ITI Khliehtyrshi, ia ki dkhot KSU, kan dang shipor sa ar bnai ban biang ki tiar

Shillong, Risaw 31: Ka Khasi Student Union Thadlaskein Unit hapoh ka jingialam u President ka Unit U Samla Conard R Sana, U General Secretary Samla Sendmisaoo Phawa ki dkhot katei ka Unit, ki la hiar sha ka jaka ai jinghikai ne ka ITI Khliehtyrshi  ban jurip iakatei ka jaka ai jinghikai.

kane ka jingleit jurip ka long halor ka jingud jingnam jong ki khynnah pule jong katei ka ITI Khliehtyrshi sha ka seng halor ki jingbymbiang ki  tiar ki tar ban pyndonkam naka bynta ban leh Practical bad kiwei kiwei pat.

Ha ka jingjurip, Ki nongialam jong ka Seng ki la ioh ban iakren bad u Vice Principal jong katei ka Institute kaba don ha Khliehtyrchi naka bynta ban pan jingshai na utei u Khlieh katei ka Jaka ai Jinghikai.

Ha ka jingiakren bad u Vice Principal u la pynpaw ba ka  dang don sa kawei ka Course ka bym pat biang ki tiar ban pyndonkam haba ai jinghikai  bad ula iathuh ruh ba kadaw jong ka jingslem ban ioh kita ki tiar ka dei namar kane ka khlam ha kaba ki briew kiba dei ban wanrah ia kitei ki tiar ki hap ban leh Quarantine ha man la ki jylla haduh ban da poi jaka.

Haka jingiakren bad ki Nongialam ka Seng, u Vice Principal ula ong ba ka lah ban shim por haduh 2 bnai eiei ban pynbeit bad ruh ban pynbiang ia ki jingdonkam hapoh kane ka Institute.

Haka juh ka por ka Seng ka la leit ban jurip ruh ia u surok ban pyniasoh sha katei ka Institute hakana ka seng ka la lap ba ka surok kala sniew sha ba palat.

Na liang ka Seng ka kyrpad jur ruh ia ki bor ba dei peit ba kin peit lem ia utei u surok bad ruh ban shna noh kloi kloi khnang ba kan pynsuk iaki ba leit na wan donkam sha katei ka jaka ai jinghikai.

” Ka jingdon jong katei ka Institute ka pynmyntoi shibun eh iaki samla jong ka thaiñ bad ka District hi baroh kawei, kumta ka dei ka kamram jong ka sorkar ban pynbiang kloi iaki jingdonkam baroh hakatei ka jaka ai jinghikai” la ong ka kyrwoh na u Publicity Secretary jong katei ka Unit u Samla Sainborlang Suchiang.

What Next?

Recent Articles

Leave a Reply

Submit Comment

*