Shillong, Iaiong 08: Ka KSU Mawlai circle ha ka 8 tarik u Iaiong 2024 hadien ba ka la ioh ka jingtip ba tikna ia ka jing don ki mynderi ha ki thaiñ Mawlai, ka la pynap shrip bad ka la ioh ban bat ia kawei ka bus kaba kit da ki phew ngut ki mynder.
La kynnoh ba kine ki dei kiba dang shu dep ban wan trei bylla na ki thain pynursla bad kiba dang thmu pat ban leit ban trei bylla sha ki bynta bapher bapher jong ka nongbah shillong ba khynthup sha ki thain Mawlai.
Hadien ka jingthohkit la lap ba baroh kine ki mynder ki dei ki bym don kot don sla kiba biang khamtam kaba donkam eh iaka syrnot wan trei bylla “Work Permit” kaba ki dei ban ioh bad na ka liang ka seng ka la beh krad lut ia baroh ba ki dei ban leit phai lut sha Assam ka jaka kaba ki wan.
Ka seng ka iai maham ba kan iai bteng ban beh krad ia kum kine ki bar jylla ba shu wan kamai khlem ki kot ki sla ki ban teh lakam iaka jingrung jingmih ka jong ki bad kiba pynkhein pylleiñ pylleiñ iaka ain.
Ka seng ka maham ruh da kaba shai lyngba kane ka kyrwoh ba iaki briew kiba ialam ia kum kine kin ngat ha ka apot ha kaba kin hap bah khlieh da jia eiei kaba sngewsih ha ka jylla baroh kawei.
