Shillong, Rymphang 22: Mynta ka sngi ki pulit jong ka Ri Bhoi District kila ioh ban kem ia ki ar ngut ki briew kiba la suba ba ki don kti ha kaba pyniap ia u khynnah shiphew snem ha shnong Umtangar Ri Bhoi District.
Katkum ka khubor kaba la pynlait mynta ka sngi sha ki lat pathai khubor na ka liang jong ki pulit ka Ri Bhoi District, ki ar ngut kiba la suba ia kaba la kem mynta ka sngi ki long u Pynshailang Warjri 32 snem bad u Banshngai Tynshong 28 snem na ka shnong Umtangar.
Ia kine ki ar ngut kiba la kem la don ha kti jong ki pulit ban tohkit shuh shuh ban tip ia ka daw tynnrai halor kane ka jingleh ia kane ka kam runar kaba la sherkhei, ka jingkem ia ki baroh ar ngut ka long katkum ka ejahar kaba la ioh hapoh Patharkhmah Police Station.
Ki pulit kila ioh ia ka ejahar ha ka 19/2/2024 kaba ujor da u bah Synsharlang Nonghyndah na ka shnong Umtangar jong ka Ri Bhoi District ba ha ka 18/2/2024 la lap ia ka met iap jong u khynnah ba dang shiphew snem na pynthor bala jah na iing ha ka 17/2/2024.
Ki pulit kila register ia ka ejahar hapoh Patahrkhmah Police Station hapoh ki kyndon, 01(2)2024 hapoh ka kyndon 302 jong ka IPC. Ha dien kane la pynlong ia ka jingtohkit bad mynta ka sngi la ioh ban kem ia ki ar ngut kiba la suba don kti ha katei ka jingpyniap ia u tei u khynnah.
