Shillong, Nohprah 06: Hadien ba ioh ia ka jingujor na ka seng ia kaba la tip kum ka Khun Kynthei Hynniewtrep Association halor ka jingbym don trading licence, ka KHADC kala pynlong ia ka jingkhynra ha Iewduh, ha ka 6 u Nohprah 2023.
Kaei kaba sngew sammut ha kane ka jingkhynra ka long ba kane ka seng ba la leit ban ujor sha u CEM ka KHADC, katba ialade pat ka khlem ïa don lang ban ialam lynti bad kdew ia kita ki dukan bar jylla kiba khlem don licence.
Ha kane ka jingkhynra ïa kaba la ialam da u Bah Gijur Myrthong uba dei u EM ba peit ia ka tnad trade, la synran lang da u Bah Fantin Lakadong bad u Bah Gabriel Wahlang kumjuh ruh u Syiem ka Hima Mylliem nalor ki myntri bad ki ophisar ka KHADC, ki enforcement bad ki pulit Syiem.
Namar ka jingbym tip shai katkum ka jingujor katei ka seng halor ka jingleh benami ki kynthei Khasi, na ka liang jong ki EM ka KHADC kila shu khynra noh tang hapoh basa kot bad la shu phah noh ia ki enforcement ban khynra pyndep hapoh iewduh bad ha kane ka jingkhynra ka KHADC kala khang noh ia saw tylli ki dukan kiba khlem Pynthymmai shuh ia ki licence jong ki.
Haba kren sha ki lad pathai khubor u Bah Gigur Myrthong uba dei u u Executive Member ba peit ia ka tnad Trade u la ong b aka jingwan jong ki sha Iewduh ban pynlong ia kane ka jingkhynra, hynrei namar ba ki nongujor kim poi satia kumta kila khynra noh tang ha ki khyndiat bynta jong ka iew.
Shuh shuh u Bah Gijur u la ong ba nangne sha khmat, na ka liang jong ka KHADC lada ioh biang ia kum kine ki nongujor kiba khlem da pynpaw ne soi kyrteng ha ka shithi, ka council kan ym shim khia shuh hadien habud.
