Shillong, Jymmang 19: U kyrtong jong ka Nationalist People Party (NPP) U Conrad Kongkal Sangma u la ioh jop ia kane ka election MP shiteng samoi na ka 2-Tura (ST) Parliamentary Constituency. Wat la u Returning officer ym pat pynbna ia ka result hynrei na ka jingniew ia ki vote la ioh jingkheiñ ba u Conrad u la tam palat lak pyrshah ia ka kyrtong jong ka seng congress ka Dikkanchi Dalbot Shira.
Ka jingpoi jong ki nongthep vote baroh ha kane ka Election hapoh jong ka 2-Tura Parliamentary Constituency ka long 484127 vote, kat haduh ba thoh ia kane ka khubor la dep ban niew 481259 vote, na kine ki vote u kyrtong ka NPP u la ioh u la dep ioh 329497 vote bad ka kyrtong jong ka Congress ka ioh 137282 vote, ha ka NOTA pat 16597 vote ka vote kaba dang sah ban niew ka long sa tang 750 vote.
Wat la ym pat ioh ia ka jingpynbna na u RO jong ka 2-Tura (ST) Parliamentary Constituency hynrei u kyrtong jong ka NPP u la tam palat lak ia ka kyrtong jong ka Congress. Ha kane ka sngi niew vote ha Tura ki nongkyrshan jong ka NPP kila ia shad da ka jingkmen ban iohi ba ki paidbah kila ai ka jingshaniah ka pura ha kane ka election.
