Shillong, Iaiong 01: Ha ka step sngi u blei por kumba 10 baje ei ei mynstep ka eriong kala lynshop ia ka shnong Saphai bad Iawthymmai ha kaba bun tylli ki iing kila shah jynrat ha ka eriong, ha kane ka jingjia kam shym don kano kano ka jingjia kaba sngewsih.
Haba u SP News Agency u la ioh ban ia kren bad ki riew rangbah na katei ka shnong kila iathuh ba ha kane ka jingjia kam shym don kano kano jingjia kaba sngewsih, hynrei bun bah ki iing kila julor bad kaba la shah ktah palat eh dei ka shnong Iawthymmai.
Ha kane ka jingshah lynshong ha ka mariang hapoh katei ka shnong kumba 15 tylli dieng post light kila khyllem bad ki dieng kila shah rat ha katei ka jingkhi ka eriong kaba la lynshop ia katei ka shnong kiba hap hapoh jong ka West Jaintia Hills District.
U Deputy Commissioner jong ka West Jiantia Hills District u bah B S Sohlya haba kren ha u SP News Agency u la iathuh ba ki don kumba 70 tylli ki iing kiba la shah ktah ha kane ka jignkhi eriong ha West Jaintia Hills District bad na ka liang jong ki BDO ha ki Block ki dang shim ia ka jingkhein.
U Deputy Commissioner la iathuh na ka liang jong ka ophis kala phah ia ki jingiarap sha kito ki long iing kiba la shah ktah ha kane ka jinglynshop ka mariag, la ba ka jingshim jingkhein ka dang iaid haduh mynta jan miet.
